Peja është mposhtur bindshëm të mërkurën mbrëma në Holandë nga skuadra Heroes Den Bosch. Den Boschi e fitoi me rezultatin 109:91 ndeshjen që e dominoi thuajse plotësisht. Ndeshja i takoi Grupit H të stinorit të rregullt të FIBA Europe Cup.
Skuadra holandeze e fitoi çerekun e parë me rezultatin 27:21, ndërsa të dytin edhe më bindshëm, 28:15. Kjo bëri që epërsia pas pjesës së parë të ishte e lartë. Çereku i tretë përfundoi 27:24 në të mirë të Pejës, ndërsa i katërti 30:28 për holandezët.
Ekipi pejan ka pasur telashe për ta zhvilluar lojën e tij. Dhe kjo solli humbjen e dytë rresht në FIBA Europe Cup. Peja po përballet edhe me mungesa.
Jay Jay Chandler u dallua te Peja me 31 pikë, katër kërcime e pesë asistime. Justin Edler i kishte 23 pikë, dhjetë kërcime e katër asistime. Ndërsa Jacob Calloway ndeshjen e përfundoi me 17 pikë e 11 kërcime.
Përkundër humbjes, Peja ka mbetur e dyta në grup me shtatë pikë, përkatësisht me bilanc prej dy fitore e tri humbje. Spojnia Stargard e Polonisë është e treta me bilanc të njëjtë. Tutje ka kaluar tashmë NINERS Chemnitz nga Gjermania, që ka fituar pesë ndeshjet e deritashme. Ndërkohë Heroes Den Bosch tashmë është skuadër e eliminuar. E shënoi fitoren e parë.
Edhe
Peja humb ndeshjen dramatike, nuk vazhdon tutje në FIBA Europe Cup
Po të mërkurën, Chemnitzi fitoi ndaj Stargardit me rezultatin 97:75. Kështu ndeshja vendimtare për vendin e dytë në grup do të zhvillohet të mërkurën e ardhshme, më 22 nëntor, në palestrën “Karagaçi”. Peja takohet me Stargardin polak. Skuadra që shënon fitore siguron vendin e dytë. Por vendi i dytë nuk është garanci për avancimin tutje.
Në fazën tjetër shkojnë fituesit e dhjetë grupeve dhe gjashtë prej dhjetë skuadrave më të mira të renditura në pozitën e dytë nëpër grupe.
