Këshilli Kombëtar i Shefave të Policisë së Britanisë (NPCC) dhe Kolegji i Policëve u kanë kërkuar falje të mbijetuarve dhe familjeve të viktimave të fatkeqësisë së stadiumit të futbollit “Hillsborough” në vitin 1989, në të cilën 97 tifozë të Liverpoolit humbën jetën.
Shefat e Policisë pranuan të martën se “policia veproi keq” teksa zbuluan planet për “reformën thelbësore”, duke përfshirë masat për të parandaluar humbjen ose shkatërrimin e provave. Gjysmëfinalja e Kupës FA e vitit 1989 ishte skena e katastrofës më të madhe sportive të Britanisë, kur tifozët e Liverpoolit u shtypën për vdekje në një tribunë të mbipopulluar dhe të rrethuar në nivelin e poshtëm të stadiumit në Sheffield. Një person vdiq në korrik 2021, pasi pësoi dëmtime të rënda dhe të trurit në atë tragjedi.
Policia fillimisht fajësoi për fatkeqësinë tifozët e dehur, një shpjegim që u refuzua gjithmonë nga të mbijetuarit, të afërmit e viktimave dhe komuniteti më i gjerë i Liverpoolit. Këto palë kaluan shumë vjet duke luftuar për të zbuluar se çfarë kishte ndodhur në të vërtetë. Hetimet e mëvonshme dhe një hetim i pavarur i shfajësuan tifozët nga çdo përgjegjësi.
“Policia ka dështuar thellësisht në atë që solli humbje të jetëve nga katastrofa e Hillsborough. Na vjen keq që shërbimi e bëri atë gjë të gabuar”, tha në një deklaratë Andy Marsh, kreu i Kolegjit të Policisë. “Dështimet e Policisë ishin shkaku kryesor i tragjedisë dhe kanë vazhduar ta dëmtojnë jetën e anëtarëve të familjeve që atëherë. Kur lidershipi ishte më i nevojshëm, të vdekurit shpesh trajtoheshin në mënyrë të pandjeshme dhe përgjigjes i mungonte koordinimi dhe mbikëqyrja.”
Martin Hewitt, kryetar i NPCC-së, tha se i vjen thellësisht keq për humbjen tragjike të jetëve dhe për “dhimbjen e vuajtjen që përjetuan familjet e 97 viktimave atë ditë” dhe në vitet në vijim.
“Ndryshimet e bëra që nga fatkeqësia e Hillsborough synojnë të sigurojnë që dështimet e tmerrshme të policisë të bëra atë ditë dhe pas saj nuk mund të ndodhin më kurrë”, shtoi ai.
Në vitin 2019, ish-shefi David Duckenfield, komandanti i Policisë i ngarkuar me operacionet në stadiume, u shpall i pafajshëm për vrasje nga pakujdesia, një vendim që kishte tronditur të mbijetuarit dhe anëtarët e familjes së viktimave.
Fatkeqësia e Hillsboroughut mbetet më e madhja sportive e Britanisë dhe u shkaktua gjatë një rritjeje të turmës në njërin skaj të stadiumit ku ishin tifozët e Liverpoolit. Një hetim i vitit 2016 erdhi pas vitesh fushatë nga familjet e viktimave dhe zbuloi se gabimet e policisë në hapjen e portës së daljes para fillimit shkaktuan përplasjen fatale.
Policia fillimisht pretendoi se tifozët kishin sulmuar portën. Në fillim të këtij muaji, tifozët e Newcastle Unitedit u ankuan për “mbipopullim dhe dërrmim”, si dhe mungesë të administrimit në stadiumin “Hillsborough” gjatë ndeshjes së Kupës FA kundër Sheffield Wednesdayt në të njëjtën tribunë “Leppings Lane End”. Rregullatori i sigurisë së stadiumeve të Qeverisë britanike njoftoi gjithashtu për një rishikim të ankesave të tifozëve të Newcastle Unitedit.