Futbolli italian është rikthyer. Pas viteve të dominimit prej skuadrave nga Spanja dhe Anglia, ka një shije të veçantë italiane në garat kryesore të Evropës në nivel klubesh këtë sezon. Pesë skuadra italiane janë kualifikuar për herë të parë në gjysmëfinalet e tri garave të UEFA-s – më shumë se Anglia dhe Spanja së bashku, pasi këto vende kanë nga dy ekipe secila që kanë mbetur në këto gara. Dhe, do të ketë patjetër një ekip italian në finalen e Ligës së Kampionëve - për herë të parë në gjashtë vjet - pasi rivalët e qytetit të Milanos, Milani dhe Inter luajnë me njëri-tjetrin në gjysmëfinale.
Juventusi dhe Roma mund të kalojnë të dy në finalen e Ligës së Evropës – do të përballen me Sevillan dhe Bayer Leverkusen, përkatësisht, në gjysmëfinale – ndërsa Fiorentina luan me Baselin në gjysmëfinalen e Ligës së Konferencës së Evropës.
“Po flasim për një rezultat të jashtëzakonshëm, të kemi pesë skuadra italiane në garat evropiane nuk ka ndodhur kurrë më parë”, tha shefi ekzekutiv i Serisë A, Luigi de Siervo. “Ne jemi të bindur se ky vit që po shesim të drejtat televizive, do ta kthejë futbollin tonë në majat e botës. Ne do të kthehemi për të treguar veten për atë që jemi. Ka qenë një udhëtim i gjatë, i krijuar me kalimin e kohës”.
Skuadrat italiane kanë shijuar disa periudha dominimi në skenën evropiane, duke përfshirë atë të viteve 1980 dhe 1990. Ndërmjet viteve 1989 dhe 1998, të gjitha, përveç një finaleje të Ligës së Kampionëve - ose Kupës Evropiane siç njihej më parë - shfaqën një ekip nga Seria A. Në krahasim me këtë, Juventusi është skuadra e vetme që arriti në finale (dy herë) të Championsit që kur Interi fitoi trofeun e fundit të Italisë në këtë garë në vitin 2010. Vetëm pesë skuadra të ndryshme italiane kanë arritur në gjysmëfinalen e garave evropiane në dekadën e fundit – megjithëse Juventusi dhe Roma arritën nga tri secila në të gjitha garat. Tani Serie A ka një shans për të përsëritur arritjen e saj nga viti 1990, duke i fituar skuadrat e saj të tri garat kryesore të UEFA-s në të njëjtin sezon. Rritja e suksesit italian në Evropë pasqyron rritjen e konkurrencës së Serie A. Pasi Juventusi dominoi ligën për gati një dekadë me nëntë tituj radhazi, ka pasur tre kampionë të ndryshëm në Serie A gjatë tre sezoneve të fundit – dhe është e sigurt se do të ketë një të katërt këtë sezon. Inter i dha fund dominimit të Juventusit në vitin 2021 dhe rivali i qytetit, Milani e fitoi titullin vitin e kaluar. Napoli tani është në prag për t’i dhënë fund pritjes 33-vjeçare për “scudetton” dhe mund ta sigurojë titullin këtë fundjavë.
“Serie A është liga e vetme në Evropë ku katër skuadra të ndryshme kanë fituar në katër vjetët e fundit: Juve, pastaj Interi, Milani dhe tani Napoli”, tha De Siervo. “Kjo është ajo që na ka bërë të përmirësohemi në Evropë gjatë katër vjetëve të fundit. Shpresoj që tani të jetë një rezultat afatgjatë”.
Napoli gjithashtu pati një ecuri mbresëlënëse në Evropë këtë sezon, duke arritur deri në çerekfinale të Ligës së Kampionëve për herë të parë, përpara se të eliminohej nga Milani. Suksesi i Romës sezonin e kaluar në Ligën e Konferencës ishte trofeu i parë evropian për një ekip italian që kur Inter fitoi “tripletën” në vitin 2010 – Ligën e Kampionëve, Serie A dhe Kupën e Italisë. Të dyja skuadrat drejtoheshin nga i njëjti njeri: Jose Mourinho. Fitorja erdhi gjithashtu vetëm një vit pasi Italia fitoi Kampionatin Evropian. E gjithë kjo ndihmoi në rrënjosjen e besimit se skuadrat italiane mund të përputheshin me më të mirat në Evropë. Për më tepër, ky besim u rrit nga ngritja në krye të dy prej klubeve më të njohura të Italisë. Shtatë herë kampioni evropian, Milani, është rikthyer në gjysmëfinale për herë të parë që kur fitoi për herë të fundit Championsin në vitin 2007. Interi gjithashtu nuk kishte arritur në këtë fazë që nga viti 2010. Një ekip italian nuk e ka fituar kurrë Ligën e Evropës në formatin aktual. Parma e fitoi atë në vitin 1999, kur njihej ende si Kupa e UEFA-s. Interi përfundoi nënkampion në vitin 2020, duke humbur nga Sevilla në finale. Rajoni italian i Emilia Romagna ka tre trajnerë në gjysmëfinalet e Ligës së Kampionëve, pasi Simone Inzaghi i Interit, Stefano Pioli i Milanit dhe Carlo Ancelotti i Real Madridit vijnë të gjithë nga ky rajon. Kjo tejkalon rekordin e mëparshëm të rajonit gjerman të Bavarisë që pati dy trajnerë në gjysmëfinale të Championsit: Julian Nagelsmann dhe Thomas Tuchel.
