Floyd Mayweather i ka dhënë fund karrierës në mënyrën më të mirë të mundshme, duke vendosur rekord në boks me 50 fitore e asnjë humbje.
Ai mbrëmë theu rekordin e Rocky Marcianos, që kishte mbyllur karrierën me 49 fitore e asnjë humbje, transmeton Koha.net.
40 vjeçari mbrëmë e mposhti kampionin e UFC-së, Conor McGregor në një nga ndeshjet më të shtrenjta në histori të boksit, e cila u zhvillua në Las Vegas.
McGregor arriti t’iu qëndroj goditjeve të Mayweatherit deri në raundin e dhjetë, moment ky që e shpalli fitues amerikanin.
Megjithatë, Mayweather ka lavdëruar irlandezin duke thënë se “ai është një kampion i vërtetë, dhe luftëtar i madh.
“Ai është një luftëtar i vështirë, dhe iu dhamë fansave atë çfarë donin të shihnin, iu kisha borxh atyre për luftën me Manny Pacquiaon. McGregor ishte shumë më i mirë se që mendoja. Ishte kundërshtar i vështirë, por unë isha më i mirë. Plani ishte që të shfrytëzonim kohën, të lejonim të godiste dhe në fund ta mposhtja”, është shprehur amerikani, raporton BBC.
Edhe
Meçi i plotë Mayweather – McGregor
“Në MMA ai lufton 25 minuta në nivel të lartë, më pas fillon të ngadalësohet. Iu kam garantuar se kjo nuk do të zgjaste aq shumë. Reputacioni i boksit ishte në rrezik”, është shprehur Mayweather.
Ai më tutje ka shtuar se shpreson që një ditë të jetë në “hollin e të famshmëve”, ndërsa ka konfirmuar se ky ishte meçi i tij i fundit.
“Rocky Marciano është një legjendë, dhe po shikoj që një ditë të hyjë në hollin e të famshmëve. Ky ishte meçi im i fundit, me siguri. Kam zgjedhur partnerin e duhur për vallëzim. Conor McGregor, je një kampion i vërtetë”, ka përfunduar ai.
