Mesfushori Nemanja Matiq është përforcimi i parë te skuadra e Romës për sezonin 2022/23. Matiq është prezantuar të mërkurën tek ekipi italian, të cilit iu bashkua si lojtar i lirë.
Ai me Romën ka firmosur kontratë njëvjeçare dhe do ta bartë fanellën me numrin 21. Matiq ka thënë se është shumë i lumtur që karrierën do ta vazhdojë në Serie A, por ka zbuluar se ishte trajneri Jose Mourinho ai që e bindi të transferohej te Roma.
“Jose Mourinho me bindi menjëherë që t’i bashkohem këtij ekipi. Jam shumë i lumtur dhe i nderuar që do të jem pjesë e Romës, që është një ekip i madh me tifozë fantastikë dhe një trajner të jashtëzakonshëm”, ka thënë Matiq.
33-vjeçari sezonin e fundit ka regjistruar 33 paraqitje për Manchester Unitedin në të gjitha garat dhe ka bërë katër asistime.
