Ekipi nga Bundesliga, Mainzi po e sfidon Leeds Unitedin për shërbimet e sulmuesit Mërgim Berisha, kanë raportuar mediumet turke të mërkurën.
Bëhet e ditur se Mainzi i ka bërë ofertë zyrtare Fenerbahçes për Berishën. Thuhet se ekipi gjerman ka ofruar dy milionë euro për ta bindur Fenerbahçen në lirimin e tij.
Megjithatë, krerët e ekipit nga Superliga e Turqisë po kërkojnë të paktën pesë milionë euro për Berishën, i cili nuk bën pjesë në planet e trajnerit Jorge Jesus për sezonin e ri.
Po ashtu, Fenerbahçe deri më tani ka refuzuar dy oferta të Leeds Unitedit që po insiston për transferimin e Berishës.
24-vjeçari është pjesë e Fenerbahçes prej vitit të shkuar kur iu bashkua nga Salzburgu i Austrisë dhe ka kontratë deri në vitin 2025.
Në 22 paraqitje në kampionatin turk, ai shënoi katër gola dhe bëri dy asistime.