Lundruesit e notarët në telashe, “mbyllen” për ta liqenet e Batllavës e Badovcit

Federata e Lundrimit e Kosovës në fund të marsit kishte planifikuar ta mbajë një aktivitet në liqenin e Batllavës dhe në atë të Badovcit. Por, lundruesit nuk u lejuan të futen në këta liqene për të zhvilluar garën.

Liqeni i Batllavës dhe ai i Badovcit nuk do të jenë në dispozicion për lundruesit, përkatësisht për Federaten e Lundrimit të Kosovës as gjatë verës. Aktivitetet në këta liqen nuk do të mund t’i zhvillojë as Federata e Notit e Kosovës e as ajo e Peshkatarisë.

Drejtues të federatave thonë se kjo është goditje për sportet e tyre. Sidomos në Batllavë janë zhvilluar më herët aktivitete të rëndësishme të notit, por edhe të lundrimit.

Dy javë më parë u vendosën shenjat për ndalimin e peshkimit dhe të notit në liqenin e Batllavës dhe Badovcit, nga ujësjellësi rajonal Prishtina, duke u thirrur në një vendim të Qeverisë së Kosovës. Vendimi është i vitit 2013. Megjithatë ai nuk është përfillur deri më tani.

Në ujësjellësin rajonal Prishtina janë të vendosur të ndalojnë çdo aktivitet të ndaluar, sipas udhëzimit administrativ për zonat e mbrojtura sanitare dhe vendimeve të Qeverisë për zonat e mbrojtura ujore.

Edhe SOT 19 kor 2021 Liqenet e Kosovës të pasigurta për not

Shenjat sinjalizuese, të vendosura në disa pjesë të liqenit të Batllavës dhe Badovcit, me qëllim të njoftimit dhe ndalimit, janë dëmtuar nga persona të ndryshëm.

“Vendimi është i kamotshëm dhe përderisa ka një vendim, nuk mund të japim leje për shfrytëzimin e liqeneve. Ndalohet me udhëzim administrativ të miratuar nga Qeveria e vendit. Nëse merren parasysh kërkesat e tyre nga Qeveria, atëherë na mbetet që ta zbatojmë, por aktualisht është vendim që të mos lejohet për not dhe peshkim”, ka thënë kryeshefi ekzekutiv i ujësjellësit Prishtina, Sokol Xhafa, të martën për KOHËN.

Nënkryetari i Federatës së Lundrimit të Kosovës, Shasivar Haxhijaj, ka thënë për KOHËN se do të dëmtoheshin shumë si federatë nëse u pamundësohet aktiviteti sportiv në dy liqenet.

“Nëse nuk do të lejohemi te bëjmë aktivitete, atëherë si Federatë e Lundrimit do të dëmtohemi shumë, ngase do të na i pamundësonte aktivitet sportive, qoftë ato trajnuese apo garuese. Ne edhe ashtu jemi federatë e re dhe jemi duke u rritur me sportistë dhe pajisje sportive (lundra), pothuajse me mjete vetanake, pa mbështetje institucionale. Aktivitet tona nuk janë te dëmshme për liqenet e Kosovës, ngase lundrat tona janë me vela dhe ato asnjë dëm nuk ua shkaktojnë këtyre liqeneve. Shpresoj se ne do të kemi mirëkuptimin e institucioneve përgjegjëse të Kosovës dhe të na lejohet zhvillimi i aktiviteteve sportive”, ka thënë Haxhijaj.

Noti kryesisht aktivitetet i zhvillon në pishina, por ka gara edhe në liqene. Madje fshati Orllan, ku ka shtrirje liqeni i Batllavës, është i njohur edhe për notarët që i ka pasur e i ka. Ata kanë ushtruar në liqene. Në liqenin e Batllavës është organizuar edhe gara e Maratonës në not.

Edhe Arbëri 4 kor 2026 Liqenet të rrezikshme për not

Notarët presin që institucionet e vendit t’ua lejojnë zhvillimin e aktiviteteve në liqenet e vendit.

“Është maratona që mbahet më shumë se pesë dekada dhe nga viti 2010 është bërë ndërkombëtare. Derisa tre apo katër vjetët e fundit është futur edhe në kalendarin e Evropës. Edhe banorët e atij vendi janë kundër sepse me padurim presin hapjen e sezonit për vizitorët. Në Batllavë ka stërvitur rregullisht klubi i notit Orllani, pastaj edhe klubet e tjera janë përgatitur për maratonën tonë dhe të shteteve të tjera. Viteve të kaluara nuk e kemi pasur asnjë ndalesë. Pra, nuk na ka thënë askush se nuk do të mund ta shfrytëzojmë liqenin e Batllavës”, ka thënë kryetari i Federatës së Notit të Kosovës, Astrit Haliti, për KOHËN.