Lëndimi i lojtarëve në përfaqësuese - Barcelona dhe Reali, skuadrat e goditura nga “virusi FIFA”

Pushimi i fundit ndërkombëtar po rezulton i kushtueshëm për disa klube evropiane, duke përfshirë fuqitë spanjolle, Barcelonën dhe Real Madridin. Të dy skuadrat do të varfërohen nga mungesat e lojtarëve të rëndësishëm shkaku i lëndimeve. Lojtarët janë prekur nga “virusi FIFA” teksa janë në detyrë me ekipet e tyre kombëtare.

Jo shumë kohë pasi Real Madridi konfirmoi lëndimet e sulmuesit brazilian Vinicius Junior dhe mesfushorit të Francës, Eduardo Camavinga, Barcelona e humbi mesfushorin Gavi për shkak të një dëmtimi të rëndë që e pësoi me Spanjën, shkaku i të cilit pritet ta humbasë pjesën tjetër të edicionit. Gavi, i cili u largua nga fusha me lot në sy në minutën e 26-të në duelin që Spanja e fitoi 3:1 ndaj Gjeorgjisë të dielën, do të ketë nevojë për operacion në ditët në vijim për shkak se ka dëmtuar ligamentin e gjurit të djathtë.

Kampioni i Premier Leagues, Manchester City, me sa duket shmangu një goditje të rëndë. Dëmtimi i kyçit të këmbës së Erling Haalandit, i pësuar në miqësoren mes Norvegjisë dhe Ishujve Faroe të enjten, nuk duket të jetë shumë serioz.

Paris Saint-Germaini nuk ishte aq me fat me Warren Zaire-Emeryn, një mesfushor 17-vjeçar i cili lëndoi kyçin e këmbës së djathtë kur u bë golashënuesi më i ri i Francës në debutimin e tij ndërkombëtar, në fitoren rekord 14:0 ndaj Gjibraltarit javën e kaluar.

Manchester Unitedi gjithashtu mund të jetë në telashe pasi portieri Andre Onana nuk mundi të përfundonte ndeshjen kualifikuese për Kupën e Botës të Kamerunit, të premten. Ndërsa Interi pa mbrojtësin Alessandro Bastoni të marrë një dëmtim ndërsa ishte në detyrë me Italinë.

Edhe Sport 20 nën 2023 Gavi përfundon edicionin para kohe

Mediat në Spanjë dhe vende të tjera u referohen lëndimeve të marra në detyrë ndërkombëtare si "virusi FIFA". Dhe lëndimi i Gavit është një shembull tjetër.

“Një çmim shumë i lartë”, ishte titulli në faqen e parë të së përditshmes sportive “Marca” të hënën, së bashku me një fotografi të sulmuesit spanjoll Ferran Torres duke mbajtur fanellën e Gavi pasi shënoi një nga golat e ekipit në pjesën e dytë.

Disa nga mediat spanjolle nxituan të fajësojnë trajnerin e Spanjës, Luis de la Fuente, që nuk e nxori Gavin nga loja më herët, kur ai mori goditje në të njëjtin gju. Ndeshja do të thoshte pak për Spanjën që kishte siguruar tashmë vendin e saj në “Euro 2024”.

Raportet e mediave lokale thanë se Barcelona po konsideronte të bënte një ankesë zyrtare në Federatën Spanjolle të Futbollit. Selektori De la Fuente tha se dëmtimi i Gavit ishte një nga momentet “më të vështira” të karrierës së tij si trajner, por vuri në dukje se nuk kishte të bënte me goditjen që ai e mori më herët.

“Kjo mund të ndodhë në çdo kohë. Ishte një aksident”, tha De la Fuente. “Është një moment shumë i vështirë. Është e vështirë për të, klubin e tij, shokët e skuadrës, për mua dhe për federatën. Jemi të shkatërruar”.

Edhe Futboll 23 kor 2026 Barcelona konfirmon lëndimin e De Jongut

De la Fuente pushoi disa nga titullarët e rregullt që kishin luajtur në fitoren 3:1 të Spanjës në Qipro të enjten, por 19-vjeçari Gavi ishte titullar edhe pse luajti gjithë ndeshjen javën e kaluar.

Klubet marrin kompensim financiar kur lojtarët e tyre lëndohen me kombëtare dhe mungojnë më shumë se 28 ditë. Por mungesa e Gavit do të ndihet te Barcelona sepse ai ishte një nga lojtarët kyç në skuadrën e trajnerit Xavi Hernandez që këtë edicion është në rrugën e duhur për të fituar trofe.

Real Madridi, që ka avancuar nga faza e grupeve të Championsit dhe po lufton për kryesimin e ligës spanjolle, do të jetë pa Viniciusin për rreth dy muaj për shkak të një dëmtimi muskulor që sulmuesi pësoi në humbjen 2:1 të Brazilit në Kolumbi në kuadër të kualifikimeve për Kupën e Botës. 23-vjeçari Vinicius ka shënuar gjashtë gola për Real Madridin këtë edicion, duke përfshirë tre në dy ndeshjet e fundit të ekipit.

Trajneri i Realit, Carlo Ancelotti, do të jetë gjithashtu pa Camavingan për disa kohë. Mesfushori 21-vjeçar ka këputur një ligament në gjurin e djathtë gjatë stërvitjes me Francën. Camavinga ishte titullar në katër ndeshjet e Realit në Ligën e Kampionëve dhe u paraqit në të gjitha 13 ndeshjet e ligës spanjolle këtë edicion.

Edhe Futboll 29 tet 2025 Barcelonës i lëndohet edhe mesfushori kryesor

Një tjetër klub spanjoll i prekur është Real Sociedadi. Mesfushori Mikel Oyarzabal, një nga lojtarët kryesorë të skuadrës, u largua nga ndeshja e Spanjës kundër Qipros me një dëmtim muskulor. Në Itali, sulmuesi Victor Osimhen nuk ka luajtur për Napolin që nga pushimi i kaluar ndërkombëtar pasi u dëmtua me Nigerinë. Nuk ishte hera e parë që ai humbi kohë me klubin e tij për shkak të problemeve që kishte me këtë përfaqësuese. Një studim i fundit nga grupi i sigurimeve “Howden” tregoi se koha e mungesës për shkak të lëndimeve të lojtarëve ishte më e gjatë pas Kupës së Botës të vitit të kaluar në Katar, e para e luajtur në dimër dhe në mes të edicionit.

FIFA miratoi programin e saj të sigurimit për klubet kur zyrtari i Bayern Munichut, Karl-Heinz Rummenigge u ankua pasi Arjen Robben u dëmtua me Holandën në Kupën e Botës 2010 në Afrikën e Jugut. FIFA ka ndarë 150 milionë dollarë për periudhën e Kupës së Botës 2023-26 për Programin e saj të Mbrojtjes së Klubeve dhe mund të paguajë maksimumin prej 7.5 milionë eurove për dëmtimin e një lojtari, sipas një tarife ditore prej 20.548 euro, për një maksimum prej 365 ditësh. Pushimi aktual ndërkombëtar i fundvitit përfundon të martën.