Nëse nuk arrin ta mposhtësh Bayern Munichun, me statistika nuk ke shans ta fitosh Bundesligën.
Në 30 vjetët e fundit, vetëm Borussia Dortmundi në vitin 2001 ka arritur ta fitojë titullin pa e mposhtur Bayern Munichun që mban rekordin me tituj në Bundesligë.
E nëse Leipzigu ka aspirata për të dalë në krye të tabelës, duhet ta gjejë mënyrën për t’i mposhtur bavarezët, transmeton KOHA.
Vetëm dy pikë e ndajnë Bayernin në vendin e parë nga Leipzigu në vendin e dytë.
Sidoqoftë, ndjekësit e bavarezëve janë në kërkim të fitores së parë në udhëtim në stadiumin “Allianz Arena”, ku lideri i Bundesligës nuk e ka humbur për një vit në të gjitha garat.
Qëkur doli në Bundesligë në edicionin 2016/17 pasi erdhi nga rangu i tretë i futbollit gjerman, Leipzigu e ka mposhtur vetëm një herë në 10 ndeshje Bayernin, por asnjëherë si mysafir. Tri ndeshjet e fundit kanë përfunduar në barazim.
Në katër vizitat e fundit në “Allianz Arena”, Leipzigu është mposhtur 3:0, 2:0 dhe 1:0, para se të barazonte pa gola në muajin shkurt.
Pasi mposhti Borussia Dortmundin 3:2 në muajin e kaluar në duelin e skuadrave të para në tabelë, Bayerni e ka shansin që ta largojë nga gara edhe një tjetër kundërshtar.
Kapiteni Manuel Neuer dhe Robert Lewandowski u pushuan të martën në barazimin 1:1 me Atletico Madridin, ndërsa Bayerni e ka siguruar kalimin tutje.
Nga ana tjetër, Julian Nagelsmann, trajneri i Leipzigut, është i pakënaqur me orarin e ndeshjeve, pasi luan me Bayernin fillimisht, e më pas edhe me Manchester Unitedin në Ligën e Kampionëve.
Bayer Leverkuseni dhe Borussia Dortmundi janë përcjellësit tjerë të liderëve. Leverkuseni luan të dielën në udhëtim te Schalke nga ora 18:00, kurse Dortmundi luan të shtunën si mysafir i Eintracht Frankfurtit nga ora 15:30.