Sami Khedira e ka hapur derën për një kalim në Premier League që mund të bëhet në vitin 2021.
Mesfushori i Juventusit e ka pranuar dëshirën se do të ribashkohej me Jose Mourinhon nëse do ta kishte mundësinë. Fituesi i Kupës së Botës i ka kaluar pesë vite me gjigantin torinez të elitës së futbollit italian.
Forma dhe problemet fizike e kanë larguar atë nga planet e “Zonjës së Vjetër”, teksa Khedira nuk ka zhvilluar ende asnjë takim këtë edicion. Madje, në dy edicionet e fundit, Khedira ka luajtur në vetëm 35 takime. 33-vjeçari tani synon ta përmbushë një tjetër ëndërr. “Kur kam qenë fëmijë, ëndërr ka qenë të jem lojtarë i Premier Leagues”, ka thënë Khedira për “Sky Germany”. “Jam shumë i lumtur dhe i kënaqur me karrierën time deri tani, por një gjë është duke munguar për shkak se ëndrra ime ende nuk është bërë realitet, të jem pjesë e Premier Leagues. Kam shikuar shumë ndeshje të Premier Leagues si fëmijë dhe jam kënaqur kur kam luajtur në Ligën e Kampionëve kundër klubeve angleze. Më ka impresionuar atmosfera, stili dhe ideja e futbollit anglez. Jam kënaqur kur kam punuar me Jose Mourinhon, por ka shumë trajnerë që do të më pëlqente të punoja me ta”, ka thënë ndër të tjerash Khedira.