Kapiteni Danilo do t’i mungojë Juventusit të paktën për një muaj, ka njoftuar ekipi italian të martën.
Mbrojtësi ka pësuar lëndim në ndeshjen e Brazilit me Venezuelën në kuadër të kualifikimeve për Botërorin e vitit 2026.
Ai ka lënduar muskulin e këmbës dhe pas kthimit në Torino është konstatuar shkalla e lëndimit të tij.
Bazuar në njoftimin e Juventusit, Danilo pritet të mungojë të paktën në tri ndeshjet e ardhshme në kuadër të Serie A. Ai do të mungojë në derbin e së dielës ndaj Milanit, ndërsa nuk do të jetë në dispozicion as për duelet me Veronën e Fiorentinën.
32-vjeçari prej vitit 2019 është pjesë e Juventusit kur iu bashkua nga Manchester City dhe ka kontratë deri në vitin 2025. Në 8 ndeshje të luajtura këtë sezon në kampionatin italian, Danilo ka kontribuar edhe me 1 gol.