Lewis Hamiltonit iu deshën gati dy muaj për t'u rikuperuar emocionalisht nga finalja e diskutueshme e Formula 1, që i kushtoi atij me titullin rekord, të tetin në karrierë. Piloti i skuadrës së Mercedesit këmbënguli të premten se kurrë nuk e kishte menduar të largohej nga F1 në shenjë proteste pas asaj që i ndodhi në garën e fundit të sezonit të shkuar. Pasi pranoi rezultatet, Hamilton e la pas debaklin dhe filloi përgatitjet për sezonin e ardhshëm.
“Ndërsa momente të tilla mund të përcaktojnë karrierën, unë refuzoj ta lë këtë të përcaktojë timen”, tha Hamilton nga selia e skuderisë së Mercedesit në Brackley, Angli.
Hamilton dominoi në garën për Çmimin e Madh të Abu Dabit në dhjetor të vitit të shkuar dhe ishte pesë xhiro larg nga thyerja e rekordit për tituj të fituar. Por një përplasje e Nicholas Latifit solli një veturë kujdesi në shteg dhe vuri në lëvizje një sekuencë të furishme ngjarjesh që ndryshuan fundin.
Drejtori i garës, Michael Masi, ndryshoi mendje kur vendosi se si ta mbyllte garën dhe Max Verstappen, i cili ishte ndalur për të ndërruar gomat, u rendit i dyti pas Hamiltonit përpara se gara të rifillonte me një xhiro të mbetur. Hamilton me goma të vjetra kishte pak shanse për t’u mbrojtur nga Verstappeni që i kishte golat e freskëta dhe që tejkaloi ngasësin britanik për të fituar titullin e tij të parë botëror.
FIA njoftoi të enjten ndryshime gjithëpërfshirëse në procedurat e kontrollit të garave dhe e hoqi Masin nga posti i drejtorit të garës, pas një rishikimi të gjerë të finales së sezonit të shkuar. Mercedes ka pranuar rezultatet e rishikimit dhe Hamilton tha se është gati për një tjetër synim për t’u futur në librin e rekordeve.
Hamilton insistoi se nuk ka asnjë problem me Verstappenin dhe tregoi se ka qenë në kontakt për t'i ofruar “mbështetjen të plotë” Latifit, i cili mori kërcënime me vdekje pas finales së Abu Dabit.
“Unë nuk mbaj mëri me askënd. Unë kurrë nuk mendoj se kjo është një gjë e mirë për ta mbajtur në vete. Unë shkova përpara. Unë nuk ndalem në të kaluarën. Ndihem i përqendruar dhe plotësisht i fokusuar. Nuk kam asgjë mbi supe që më pengon këtë vit. Nëse mendoni se ajo që patë në fund të vitit të kaluar ishte më e mira nga unë, atëherë prisni ta shihni këtë vit”.
Hamilton fitoi tri gara rresht për t’u barazuar me Verstappenin në renditjen e përgjithshme dhe gara në Abu Dabi ishte vendimtare për titull. Ai dominoi garën dhe udhëhoqi në 51 nga 58 xhiro. Verstappen udhëhoqi vetëm në xhiron e fundit për të fituar titullin.
Hamilton dha vetëm një intervistë të shkurtër pasi u largua nga bolidi i tij, por u shfaq i tronditur në podium ndërsa Verstappeni dhe Red Bulli festonin. Hamiltoni anashkaloi konferencën e detyrueshme të shtypit pas garës, bojkotoi ceremoninë gala të përfundimit të sezonit dhe bëri vetëm një paraqitje publike - tri ditë pas garës kur ai mori titullin kalorës në Kështjellën Windsor.
Tërheqja e Hamiltonit nga syri i publikut bëri pak për të shuar spekulimet se ai ishte aq i pakënaqur sa po mendonte të largohej nga F1 pas 103 fitoreve në 15 sezone. Ai më në fund u rishfaq në fillim të këtij muaji me një postim në mediat sociale, më pas mori pjesë të premten në prezantimin e bolidit të Mercedesit për sezonin e ri. Hamilton pranoi pyetje për rreth 20 minuta të premten dhe tha se kaloi kohën pas Abu Dabit me të gjithë familjen e tij - një moment i rrallë që ata ishin të gjithë së bashku në të njëjtin vend. Ai tha se u përqendrua në të qenit i pranishëm te të dashurit e tij dhe nuk ka parë reprizën e garës, duke mos ndier asnjë dëshirë për të rishikuar ngjarjen.
Drejtori i ekipit të Mercedesit, Toto Wolff, tha se ai “kurrë nuk ishte i shqetësuar” se Hamiltoni do të tërhiqej.
“E dinim se duhej të merrte kohë për të reflektuar mbi gjërat dhe veçanërisht për të kuptuar se si do të kthehej në kuadrin e duhur mendor”, tha Wolff. “Mendoj se ajo që bëri ishte absolutisht e drejtë për ta nxjerrë veten nga mikroskopi i Formula 1 dhe u largua mënjanë. Ai është rikthyer me një mentalitet të shkëlqyer. Ai është pozitiv dhe i vendosur për sezonin e ri”.
Hamilton mbushi 37-vjet muajin e kaluar dhe do të jetë partner me pilotin tjetër britanik George Russell për sezonin e ri. Russell iu bashkua Mercedesit nga Williamsi. Hamilton tha se është më i përkushtuar se kurrë për të garuar për një titull tjetër.
“Unë mendoj se në fund të sezoneve pyetja është nëse je i gatshëm të përkushtosh kohën, përpjekjen që duhet për të qenë kampion bote. E unë jam i gatshëm për një gjë të tillë. Në përgjithësi jam një person shumë i vendosur. Jam i fokusuar që të jem më i miri dhe të rikthehem më i fortë në sezonin e ri”.
Edicioni 2022 në Formula 1 nis më 22 mars në Bahrejn.