Futbolli do të përballet me virusin në Kupën e Afrikës, që është gati për të nisur

Kupa e Afrikës më në fund do të fillojë të dielën në Kamerun, tre vjet më vonë sesa ishte planifikuar dhe pas dy shtyrjeve. Shtyrja e parë ishte rezultat i përgatitjeve të gabuara të vendit pritës dhe tjetra për shkak të një pandemie globale, që organizatorët dhe gjithë të tjerët kishin shpresuar se do të ishte kaluar deri tani.

Në vend të kësaj virusi po rritet përsëri për shkak të variantit Omicron, duke e lënë turneun më të madh të futbollit të kontinentit në të njëjtin vend që ishte 12 muaj më parë, me aftësitë e Mohamed Salahut, Sadio Manes dhe shumë të tjerëve në rrezik për t'u eklipsuar nga infeksionet dhe shpërthimet, në një rajon që ka disa nga numrat më të ulët të vaksinimit në botë.

Mes disa thirrjeve për ta shtyrë sërish, organizatorët do të vazhdojnë turneun me 24 ekipe, me 52 ndeshje, në vendin e Afrikës Qendrore. Ai do të zgjasë një muaj. Do të fillojë dhe do të përfundojë në stadiumin “Olembe” në Yaounde, kryeqyteti i Kamerunit.

Presidenti i futbollit afrikan, Patrice Motsepe, premtoi një “turne të jashtëzakonshëm”, edhe nëse përballet me më shumë sfida se zakonisht. Virusi është larg nga i vetmi problem i mundshëm.

Kameruni fillimisht ishte planifikuar ta priste Kupën e Afrikës në vitin 2019, por u hoq nga organizimi i atij turneu, sepse ishte shumë prapa me përgatitjet e stadiumeve. Ka pasur punë të furishme në minutat e fundit dhe, siç ndodh shpesh me Kupën e Afrikës, gjashtë stadiumet në pesë qytete nuk do të jenë të klasit botëror, por mund të kryejnë punë. Vetëm tifozët e vaksinuar plotësisht dhe me dëshmi të testeve negative do të lejohen të marrin pjesë në ndeshje. Ky kufizim i vonshëm u fut në fuqi për të qetësuar nervat e autoriteteve shëndetësore të Kamerunit, të cilat kishin frikë nga një përhapje e madhe e variantit Omicron.

Turneu ndonjëherë përballet me turma të vogla në tribuna, por ndeshjet e tij janë gjithmonë të habitshme dhe unike. Me më pak se tre për qind të popullsisë së Kamerunit të vaksinuar plotësisht, shumica dërrmuese e kamerunasve nuk do të lejohen të shohin momentin më të madh sportiv të vendit të tyre që nga pritja e fundit e Kupës së Afrikës 50 vjet më parë. E shtyrë mënjanë nga virusi dhe çështjet e infrastrukturës, ka një kryengritje të plotë në pjesën jugperëndimore të Kamerunit, ku separatistët anglofon që kundërshtojnë qeverinë frankofone kanë luftuar për të formuar një shtet të shkëputur dhe kanë filluar të përdorin pajisje shpërthyese të improvizuara.

Kërcënimi për Kupën e Afrikës është real. Një shpërthim në një universitet pranë qytetit pritës të turneut, Limbe, dhe pak kilometra larg nga vendi që do të jetë një bazë zyrtare trajnimi e ekipit, plagosi 13 persona në muajin nëntor. Më shumë se 3000 njerëz janë vrarë në këtë konflikt. Do të ketë një shtetrrethim gjatë natës në rajon, thanë zyrtarët lokalë. Ka të ngjarë të ketë prani të madhe ushtarake gjatë kohës së turneut.

Pasiguria dhe virusi kanë bërë që klubet kryesore evropiane të vënë në pikëpyetje planet e shëndetit dhe sigurisë, si dhe të shprehin shqetësimet për mirëqenien e lojtarëve të tyre afrikanë. Por në të vërtetë është vetëm versioni më i fundit i këtyre mospajtimeve që shfaqen çdo dy vjet. Kjo sepse Kupa e Afrikës luhet në fillim të vitit dhe në mes të dy stinorëve të ligave evropiane.

Mbrojtësit e Kupës së Afrikës thonë se është një objektiv i lehtë dhe virusi po rritet në Evropë dhe ligat e futbollit atje janë nën tendosje nga shpërthimet.

“Klubet e Evropës duhet të respektojnë lojtarët afrikanë, të respektojnë Kupën e Afrikës dhe tifozët afrikanë. Virusi nuk është kërcënim vetëm në Kamerun”, tha ish-lojtari i Kamerunit, Geremi.

Pavarësisht ankesave nga Evropa, të gjitha indikacionet tregojnë se talentet më të mira të Afrikës do të jenë në Kamerun.

Senegali - me sulmuesin Mane përpara, portierin e Chelseat, Edouard Mendy, në prapavijë dhe lojtarët kryesorë në të gjitha repartet - është një nga favoritët për ta fituar titullin dhe mos të lejojë Algjerinë që ta mbrojë atë.

Salah do të jetë kapiteni i Egjiptit, i cili është ekipi më i suksesshëm i futbollit afrikan, por që nuk ka fituar titull kontinental që nga viti 2010.

Maroku, me një mbrojtje të fortë, ishte mbresëlënës në kualifikime. Sfida e Kamerunit, si një nga ekipet kryesore të futbollit afrikan dhe çerekfinalist i Kupës së Botës 32 vjet më parë, do të jetë të mos përkulet nën presionin e mikpritësit.

Dy skuadra po bëjnë debutimin, Komorosi, një vend i vogël nga ishulli në brigjet lindore të Afrikës me më pak se një milion njerëz, dhe Gambia.

Me një mori çështjesh jashtë fushës, organizatorët mezi presin që Kameruni të nisë turneun kundër Burkina Fasos të dielën dhe që futbolli të ketë një shans për t’i pushtuar titujt botërorë.

“Unë po vij për të parë futboll”, paralajmëroi Mostepe, kreu i futbollit të Afrikës.