Udhëheqja frymëzuese e Didier Deschamps dhe një grup i thellë talentesh e kanë kthyer Francën në forcën më të frikshme në futbollin ndërkombëtar ndërsa përgatitet të përballen me Argjentinën në finalen e Kupës së Botës të së dielës. Franca mbërriti në Katar duke synuar të sfidonte fatin e shumë mbajtësve të fundit të trofeut, edhe pse një vërshim lëndimesh kërcënoi të prishte mbrojtjen e titullit të tyre. Kampionët në fuqi ishin eliminuar në fazën e grupeve në katër nga pesë turnetë e fundit, duke përfshirë vetë Francën në vitin 2002. Por skuadra e Deschampsit, sipas fjalëve të tij, ka “përmbysur trendin” dhe pasi mposhti Marokun 2:0 në katërshen e fundit të mërkurën, tani ka shansin ta shkruajë historinë në finalen në stadiumin Lusail. Asnjë ekip nuk e ka ruajtur trofeun që nga Brazili në vitin 1962, ndërsa asnjë kampion në fuqi nuk kishte arritur as në finale që nga brazilianët në vitin 1998. Ajo skuadër e Brazilit humbi në Paris ndaj një ekipi francez, ku kapiten ishte Deschamps, i cili ka qenë atje për pothuajse të gjitha momentet më të bukura të vendit të tij në turnetë e mëdhenj gjatë një brezi. Pasi i çoi ata drejt lavdisë katër vjet më parë, ai mund të bëhet trajneri i parë që fiton dy Kupa Botërore që nga Vittorio Pozzo i Italisë në vitet 1930.
“Deschamps ka qenë në tri finale tani dhe ai i fiton ato”, tha presidenti francez, Emmanuel Macron, pasi bëri një vizitë fluturuese në Katar për gjysmëfinalen. “Gjërat vijnë gjithmonë në tre. Didier Deschamps sjell fat, si dhe talent, kështu që ne do ta fitojmë atë dhe do ta sjellim trofeun në shtëpi”.
Fitore ose humbje kundër Argjentinës së Lionel Messit, Franca po kalon një periudhë të jashtëzakonshme suksesi të qëndrueshëm në futbollin ndërkombëtar që filloi me atë triumfin e Kupës së Botës në vitin 1998 dhe vazhdoi me fitoren e tyre në “Euro 2000”. Deschamps nuk ishte i përfshirë pasi “Les Bleus”, me Zinedine Zidane si kapiten, arriti përsëri në finalen e Kupës së Botës në vitin 2006 dhe humbi nga Italia.
Tani, ndërsa ata kërkojnë të bëjnë histori në Doha, është e lehtë të harrohet kampanja katastrofike e Francës në vitin 2010 dhe se ata nuk shiheshin si pretendentë kur Deschamps mori drejtimin në vitin 2012. Por ai tani i ka udhëhequr ata në tri finale në katër turne të mëdha, me “Euro 2016” që përfundon me një humbje të dhimbshme në kohën shtesë ndaj Portugalisë. Franca gjithashtu fitoi Ligën e Kombeve vitin e kaluar dhe eliminimi i saj në 1/8 e finales në “Euro 2020” duket si një anomali. Ata tani kanë arritur në katër finale të Kupës së Botës në shtatë edicione, duke e vendosur veten në të njëjtin grup me fituesit e shumëfishtë: Gjermaninë, Italinë dhe Brazilin. Menaxhimi i Deschamps ka qenë kyç, edhe pse ai e hodhi poshtë rolin e tij personal pas fitores kundër Marokut.
“Unë nuk jam më i rëndësishmi”, tha ai. “Bëhet fjalë për përfaqësuesen franceze”.
Trajneri i Marokut me origjinë franceze, Walid Regragui, përmblodhi arsyet e suksesit të Francës.
Edhe
Fituesi i lindur, Deschamps, e çon Francën sërish drejt lavdisë
“Kur shihni se çfarë ka bërë Franca gjatë 20 vjetëve të fundit, ata janë vendi më i mirë i futbollit në botë”, tha ai. “Unë jam gjithashtu krenar sepse jam rritur në Francë. Ata kanë lojtarët më të mirë, trajnerët më të mirë dhe ekipi i tyre është më i miri në botë”.
Klubet franceze e kanë kthyer zhvillimin dhe shitjen e talenteve të rinj në ligat fqinje në një formë arti, shpesh në dëm të tyre kur vjen puna për të konkurruar në Evropë. Por përfaqësuesja ka përfituar. Kylian Mbappe i jashtëzakonshëm është simboli aktual i skuadrës së Deschampsit, të cilët janë pa fituesin aktual të “Topit të Artë”, Karim Benzema, për shkak të lëndimit. Vetëm pesë nga ata që filluan për Francën në finalen e vitit 2018 ka të ngjarë ta bëjnë këtë të dielën, ndërsa Hugo Lloris, Antoine Griezmann dhe Olivier Giroud janë të vetmit të mbijetuar nga “Euro 2016”. Por të tjerë, si 22-vjeçari Aurelien Tchouameni apo edhe Randal Kolo Muani janë rritur në Katar dhe Franca është sërish në një finale të Kupës së Botës. Është një territor i njohur për ta këto ditë.
