Forca e vërtetë e Sllovakisë

Vetëm në ndeshjen e fundit kualifikuese, Gjermania e siguroi pjesëmarrjen direkte në Kupën e Botës 2026. “Përgjegjëse” për këtë është Sllovakia, që e la të hapur garën në Grupin A deri në fund.

Më 17 nëntor, Gjermania fitoi bindshëm, 6:0, ndaj sllovakëve dhe u kualifikuar direkt në Botërorin në SHBA, Kanada e Meksikë.

Është vështirë të thuhet që Sllovakia e shfaqi më të mirën e mundshme në ndeshjen në Leipzig.

Fitorja 2:0 në Bratisllavë, më 4 shtator, po ndaj Gjermanisë, dëshmon që Sllovakia është përfaqësuese goxha serioze. Jo e nivelit të Gjermanisë, por e nivelit serioz evropian.

Sllovakia e pret Kosovën në gjysmëfinale të plejofit për kualifikim në Botërorin 2026. Ndeshja luhet më 26 mars të vitit të ardhshëm. 

Edhe Futboll 20 jan 2026 Selektori i Sllovakisë flet për ndeshjen ndaj Kosovës

Në kualifikimet e rregullta sllovakët i shënuan katër fitore dhe i pësuan dy humbje. Pos nga Gjermania pësuan edhe nga Irlanda e Veriut në Belfast, më 10 tetor, me rezultatin 2:0. Por në shtëpi i kanë fituar të gjitha tri ndeshjet: 2:0 ndaj Gjermanisë, 2:0 ndaj Luksemburgut dhe 1:0 ndaj Irlandës së Veriut.

Fitorja ndaj Irlandës së Veriut, më 14 nëntor ishte shumë e vështirë – me gol të minutës së 91-të.

Sa u takon rezultateve, sllovakët nuk kanë pasur ndonjë stabilitet këtë vit. Në mars fillimisht luajtën pa gola me Slloveninë në shtëpi e më pas u mposhtën 1:0 në Lubjanë. Dhe kështu mbetën në Ligën C të Ligës së Kombeve. Në të njëjtën kohë Kosova fitoi dy ndeshjet me Irlandën dhe avancoi nga Liga C në Ligën B.

Në qershor, Sllovakia pësoi 4:1 në miqësore nga Greqia dhe më pas edhe 1:0 nga Izraeli. 

Viti i kaluar ishte goxha i suksesshëm për Sllovakinë. Paraqitja në Euro 2024 e dëshmon këtë. Në Evropianin në Gjermani, kundërshtarja e ardhshme e Kosovës fillimisht fitoi 1:0 ndaj Belgjikës. Më pas humbi 2:1 nga Sllovakia dhe barazoi 1:1 me Rumaninë. E kaloi grupin me sukses. 

Në një të tetën e finales pësoi 2:1 nga Anglia, por vetëm pas vazhdimeve.

Në vjeshtën e kaluar, Sllovakia mbeti e dyta në grup në Ligën C të Ligës së Kombeve, njëjtë si Kosova.

Suedia e fitoi grupin me 16 pikë, ndërsa Sllovakia mbeti me 13. Estonia i kishte vetëm katër e Azerbajxhani vetëm një. Me Suedinë, sllovakët kishin barazim në shtëpi dhe humbje në udhëtim.

Edhe Futboll 24 nën 2025 Sfidat e Sllovakisë pak javë para përballjes me Kosovën

Italiani Francesco Calzona, është selektor i Sllovakisë. Ai vjet ishte trajner i Napolit nga 19 shkurti deri më 5 qershor të vitit të kaluar. Por nuk u shqua për ndonjë sukses.

“Kosova është ekip që po rritet në kuptimin e performancës futbollistike. Te Kosova zgjodhën një rrugë, po i përmbahen asaj dhe tani po mbledhin frytet e para. Në kualifikime fitoi në Suedi dhe Slloveni, ndërsa barazoi në shtëpi me Zvicrën. Duhet të përfitojmë nga fakti që luajmë në shtëpi, ndonëse është ekip i pakëndshëm dhe i vështirë edhe në fushën e kundërshtarit”, ka thënë Calzona.

Ai e drejton Sllovakinë që nga 30 gushti i vitit 2022. Pra vlerësohet për punën që e bën te kjo përfaqësuese.

Martin Dubravka i Burnleyt është portier i parë i Sllovakisë. Në mbrojtje sllovakët kanë lojtarë cilësorë si kapitenin Milan Shkriniar (Fenerbahçe), Adam Obert (Cagliari), Denis Gyomber (Al Kholood) e David Hancko (Atletico Madrid). Aty janë edhe lojtarët e Bundesligës si Peter Pekarik i Herthas e Denis Vavro i Wolfsburgut.

Stanislav Lobotka i Napolit vlerësohet lojtari kryesor i mesfushës. Në ndeshjen e fundit startuan edhe Matush Bero i Bochumit dhe Ondrej Duda i Al-Ettifaq. Mesfushorët e tjerë luajnë në Kayserispor, Genk, Stoke City e Toulouse.

David Strelec i Middlesbrough udhëhoqi sulmin ndaj Gjermanisë. Startuan edhe David Durish i Rosenborgut norvegjez dhe Leo Sauer i Feyenoordit holandez. Në Stoke City, Lechia Gdansk të Polonisë, Sparta Pragë e Slavia Pragë të Çekisë, Holsten Kiel të Gjermanisë dhe AEL të Greqisë janë lojtarët e tjerë ofanzivë sllovakë.

Lojtarët e Sllovakisë paraqiten në nivel të përafërt me ata të Kosovës.

Sipas “transfermarkt”, vlera e përfaqësueses aktuale të Sllovakisë është 138 milionë euro. Ndërkohë vlera e Kosovës, sipas kësaj faqe të specializuar, është 131 milionë euro.

Edhe Futboll 20 nën 2025 Kosova kundër Sllovakisë në gjysmëfinale të plejofit

Rrjedhimisht, Sllovakia është kundërshtare që vlerësohet se mund të kalohet me sukses nga Kosova.

Por, është përfaqësuese e nivelit serioz evropian.