Flick do të drejtojë Bayernin deri në vitin 2023

Klubi i madh gjerman i futbollit, Bayern, ka vazhduar bashkëpunimin me trajnerin Hansi Flick.

Bayerni ka njoftuar se si rezultat i bisedave pozitive, kryetari Karl-Heinz Rummenigge, anëtari i bordit, Oliver Kahn dhe drejtori sportiv, Hasan Salihamixhiq kanë arritur marrëveshje për vazhdim të kontratës me kryetrajnerin Flick deri më 30 qershor të vitit 2023.

Flick 55-vjeçar, ka qenë lojtar i Bayernit nga viti 1985 deri në vitin 1990. Ka fituar katër tituj të kampionit të Gjermanisë, një Kupë të Gjermanisë dhe një Superkupë.

Karrierën si trajner e ka nisur te skuadra e kategorisë së katërt, Victoria Bammental. Mori përvojë si kryetrajner i Hoffenhemit e më pas si asistent i Giovannit Trapattonit te Red Bull Salzburgu. Selektori i Gjermanisë, Joachim Loew e përfshiu në staf në vitin 2006. Pas suksesit në Botërorin e vitit 2014, ku Gjermania u shpall kampion, Flick u emërua drejtor sportiv i Federatës gjermane. Punoi prapë te Hoffenheimi, ndërsa te Bayerni u kthye si asistent në verën e vitit të kaluar. Kur Niko Kovaq u largua nga posti i trajnerit në fillim të nëntorit, Flick u bë trajner i përkohshëm. Më 22 dhjetor Bayerni njoftoi se Flick do të mbetet në post deri në fund të edicionit, ndërsa tani ia ka vazhduar kontratën edhe për tri vjet tjera.

“Bisedat me drejtuesit e klubit ishin shumë të mira. Ne kemi përcaktuar rrugën për vitet e ardhshme. Jam i bindur se mund të arrijmë shumë së bashku”, ka thënë Flick.

“Bayerni është shumë i kënaqur me punën e trajnerit Hansi Flick. Ekipi është zhvilluar shumë mirë nën drejtimin e tij. Ekipi po luan futboll atraktiv, që po ashtu është reflektuar në rezultate. Ne jemi i vetmi ekip gjerman që kemi mbetur në garë në tri kompeticione. Më pëlqen mënyra se si ai e drejton ekipin. Kualitetet e tij si person janë bindëse. Ne i besojmë atij dhe jemi të bindur se do të vazhdojmë të realizojmë synimet se bashku me të në të ardhmen”, ka thënë Karl-Heinz Rummenigge.