Benzema vazhdon shkëlqimin, barazon Raulin me gola të shënuar te Reali

Karim Benzema vazhdon të shtojë emrin e tij në librat e rekordeve të Real Madridit, duke shënuar golin e tij të 323-të të enjten për t’u barazuar me Raul Gonzalezin si golashënuesi i dytë më i mirë i klubit pas Cristiano Ronaldos. Benzema shënoi në pjesën e parë të fitores 6:0 të Real Madridit ndaj Levantes të vendin e fundit në ligën spanjolle, ndonëse ekipi i trajnerit Carlo Ancelotti ka disa javë që e ka siguruar titullin e kampionit në La Liga. Rezultati vulosi rënien e Levantes në një kategori më poshtë për sezonin e ardhshëm pas pesë vjetëve rresht në elitën e futbollit spanjoll.

Vinicius Junior, partneri i besuar i Benzemas në sulm gjatë gjithë sezonit, shënoi “hat trick” për Real Madridin teksa vazhdon të përgatitet për finalen e Ligës së Kampionëve kundër Liverpoolit në Paris më 28 maj, kur do të përpiqet të fitojë trofeun e 14-të evropian. Benzema tani ka 128 gola më pak se 451 golat e shënuar nga portugezi Ronaldo, i cili luajti në klub deri në vitin 2018. Raul, trajneri i skuadrës “B” të Realit, luajti për klubin në vitet 1990 dhe 2000. Goditja me kokë e Benzemas nga afërsia në minutën e 19-të pas një harkimi të Viniciusit, ia dha sulmuesit francez golin e 27 këtë edicion në ligë, i cili tani ka nëntë gola më shumë se çdo lojtar tjetër në kompeticion këtë sezon.

Ai ka shënuar më shumë se një të tretën e 79 golave ​​të Real Madridit në ligë deri më tani. Ishte goli i 20-të në 15 ndeshjet e fundit në të gjitha garat për Benzeman, i cili ka qenë kyç në ecurinë e Realit në finalen e Ligës së Kampionëve, duke shënuar gola vendimtarë në çdo raund eliminator të turneut evropian – përfshirë dy “hat-tricka”. Ai mund të kishte shtuar në llogarinë e tij edhe një gol të enjten, por pa egoizëm asistoi te Viniciusi për golin e pestë të Realit në duelin ndaj Levantes.

“Lidhja me Benzema ka qenë shumë e mirë gjatë gjithë sezonit”, pranoi Vinicius, i cili tani është golashënuesi i tretë më i mirë në ligë me 17 gola. “Karimi ka pasur një sezon të mrekullueshëm dhe shpresojmë se ai mund ta përfundojë atë duke fituar ‘Topin e Artë’ sepse e meriton”.

Viniciusi kishte shënuar golin e tij të parë në pjesën e parë përpara se të mbyllte rezultatin në minutat e fundit me golin e tretë personal për Real Madridin. Ferland Mendy dhe Rodrygo shënuan golat e tjerë pa përfunduar pjesa e parë. Benzema u zëvendësua në të 75-të së bashku me Luka Modriqin, i cili asistoi në tre golat e ekipit të tij.

Benzema, Modriq, Mendy, Vinicius dhe portieri Thibaut Courtois nuk kishin startuar në derbin e javës së shkuar kundër Atletico Madridit, ndeshje kjo që Reali e humbi me rezultatin 1:0. Atletico nuk ia bëri gardën e nderit Realit në stadiumin “Wanda Metropolitano”, por lojtarët e Levantes e bënë të enjten, duke u rreshtuar në krah dhe duke duartrokitur lojtarët e klubit madrilen teksa hynin në fushë në stadiumin “Santiago Bernabeu”.