As VAR-i nuk i shpëton gjyqtarët nga kritikat

Aplikimi i sistemit VAR në Kosovë u prit me bujë të madhe. U vlerësua se kritikat në adresë të gjyqtarëve të Kosovës do të jenë dukshëm më të vogla se në edicionet e kaluara. Por, vendimet e marra në disa ndeshje nga disa gjyqtarë, janë kritikuar qysh në javën e parë të edicionit të ri të Superligës së Kosovës në futboll. Ankesa se nuk pati vlerësim korrekt në disa raste pati edhe trajneri i Dukagjinit të Klinës, Armend Dallku. Dukagjini në ndeshjen e parë, luajti baras 2:2 në udhëtim te Ballkani i Suharekës. Dallku në emisionin sportiv të KTV-së “Sporti Total” të dielën mbrëma tha se gjyqtari kryesor Visar Kastrati, gaboi që në rastin e penalltisë së dhënë në favor të Ballkanit, pasi nuk u konsultua me dhomën e VAR-it. Madje, tha se pas ndeshjes, Kastrati i ka thënë se për ta kërkuar rishikimin nëpërmjet VAR-it për rastin e penalltisë për Ballkanin, “nuk keni protestuar”.

“Pas ndeshjes, kemi pasur një bashkëbisedim me gjyqtarin dhe na është thënë që nuk keni protestuar dhe nuk e kam parë VAR-in. Këtu gjyqtari nuk është konsultuar fare me VAR-in dhe ka qenë shumë i bindur se ka qenë penallti dhe ne nuk kemi reaguar fare edhe si ekip edhe si lojtarë. Gjyqtari që ka ndarë drejtësi në këtë ndeshje ka qenë edhe ligjërues sa i përket VAR-it. Ne gjatë tërë javës kemi punuar me futbollistët që tash do të jetë gjithçka ndryshe dhe nuk duhet të protestojmë, sepse gjithçka do të vendoset brenda fushës përmes VAR-it ku do të shikohet me shumë vëmendje, nuk do të ketë hatërmbetje e shumë gjëra të tjera. Nuk më është dukur e drejtë nga ana e gjyqtarit të mos konsultohet me VAR-in kur ka dyshime”, ka thënë Dallku.

Gjyqtari Kastrati është kontaktuar nga KOHA, por nuk ka dashur të komentojë deklaratat e Dallkut. I habitur me atë se çfarë i ka thënë gjyqtari Kastrati trajnerit Dallku pas ndeshjes, është shprehur edhe kapiteni i Feronikelit, Lapidar Lladrovci.

“Gjatë ligjëratave për VAR, gjyqtarët na kanë këshilluar që nuk kemi të drejtë ne si futbollistë të protestojmë, sepse nëse protestojmë dhe kërkojmë të shikohet VAR-i, do të ndëshkohemi me karton të verdhë. Tash si ka mundësi të thotë që është dashur të protestojnë e neve na është thënë të mos protestojmë”, ka thënë Lladrovci për “Sportin Total”.

Vendimin e Kastratit, Dallku në dyshim e ka vënë edhe në rastin e kartonit të kuq të dhënë për Ahmed Januzin nga gjyqtari Kastrati. Januzi u përjashtua nga ndeshja në minutën e 71-të. Në fakt, gjyqtari Kastrati fillimisht e ndëshkoi Januzin me karton të verdhë, por pasi u konsultua me VAR-in, e ndëshkoi me kartonin e kuq.

Edhe Sport 29 nën 2021 Akuzat e Dallkut në drejtim të gjyqtarëve: VAR-i për dikë nënë, për dikë njerkë

“Nëse shihet me vëmendje, lojtari ynë e prek fillimisht topin dhe në lëvizje, këmba i shkon këmba e lojtarit kundërshtar, por këtu qëllimi nuk ka qenë këmba e tij. Nëse do të ishte e qëllimshme, kartoni i kuq nuk do të duhej të diskutohej, por në rastin e penalltisë, nuk i vinte as era penallti”, është shprehur Dallku.

Dy vendimet e kundërshtuara nga Dallku nuk ishin edhe të vetmet e xhiros së parë të Superligës që u zhvillua vikendin e shkuar. Ankesa në drejtim të gjyqtarëve ka edhe trajneri i Drenicës, Tahir Lushtaku. Ai thotë se ekipi i tij u dëmtua në tri raste. Drenica në xhiron e parë, barazoi 1:1 në shtëpi kundër skuadrës së Gjilanit.

“Po besoj që kanë qenë tri situata të dyshimta, apo tri raste diskutabile që ndoshta është dashur të vendosen përmes VAR-it. Por, gjyqtari Genc Nuza si duket i ka marrë vendimet ashtu si i ka menduar ai, por besoj që në minutën e tretë te Baton Zabërgja ka qenë penallti te goditja e lirë kur është shënuar goli i parë nga ne ka qenë lojtari i fundit në drejtim të golit dhe mendoj se është dashur karton i kuq dhe një rast në pjesën e dytë te ndërhyrja brenda zonës në Denisson që mendoj se Nuza është dashur pa u hamendur të akordojë penallti. Është konsultuar me dhomën e VAR-it, por sërish ka marrë vendim të mos akordoj penallti dhe unë mendoj se ka qenë 100 %. Por, sido që të jetë, ne nuk jemi ankuar e as nuk po ankohemi në referim, por mendoj që janë raste të pastra që kanë ekzistuar. Në Skenderaj, VAR-i nuk ka funksionuar”, ka thënë Lushtaku të hënën për KOHËN.

VAR-i ka nisur të implementohet që prej ndeshjes së Superkupës së zhvilluar javën e shkuar në mes të kampiones Prishtinës dhe fituesit të Kupës, Llapit. Ndërsa, për vendimet e gjyqtarëve të xhiros së pari pati ankesa. Megjithatë, kryetari i Federatës së Futbollit të Kosovës (FFK), Agim Ademi, thotë se VAR-i nuk është për të rishikuar secilën ndërhyrje sepse sipas tij, në të kundërtën ndeshja do të zgjaste tri orë.

Edhe Sport 12 sht 2021 Dallku mendon se kanë mundur të fitojnë ndeshjen, kritikon gjyqtarin Kasumi

“VAR-i është sistem për të mirën e futbollit, pra nuk është as për federatën e as për klubet. Është vetëm për të mirën e futbollit dhe duhet pak kohë deri sa të adaptohemi të gjithë me të. Në të gjithë botën, aplikohet ky sistem dhe është nevojitur pak kohë për adaptim. Gjithashtu, VAR-i nuk është për t’u rishikuar secila ndërhyrje, sepse ashtu do të zgjaste ndeshja tri orë. Janë referët në dhomën e VAR-it, të cilët e këshillojnë referin në fushë për ndonjë rast diskutabil. E kemi implementuar për një kohë shumë të shkurtër dhe gjërat do të shkojnë vetëm duke u përmirësuar”, ka thënë Ademi.

Në FFK, implementimin e VAR-it e kanë vlerësuar si projektin më të madh që nga pranimi në UEFA dhe FIFA.