Kylian Mbappe shqetësoi tej mase amerikano-jugorët në muajin maj kur tha se Argjentina dhe Brazili nuk luajnë ndeshje “në një nivel të lartë” në kualifikimet për të arritur në Kupën e Botës. I intervistuar nga një televizion brazilian, sulmuesi francez insistoi se Amerika e Jugut mbetet prapa Evropës për sa i përket fuqisë së konkurrencës. Ai vuri në dukje së kampionët më të fundit në Kupën e Botës – duke përfshirë Francën në vitin 2018 – kanë qenë përfaqësueset nga Evropa. Ndërkohë nuk munguan përgjigjet ndaj Mbappes.
Lionel Messi, bashkëlojtari i tij te Paris Saint-Germaini, tha se evropianët nuk kanë asnjë ide për sfidat e të luajturit ndeshjet kualifikuese për Kupën e Botës në një lartësi të madhe në Bolivi ose nxehtësinë dhe lagështinë e bregdetit të Karaibeve të Kolumbisë. Përzgjedhësi i Brazilit, Tite, insistoi se kualifikimet në zonën e Amerikës së Jugut kanë një shkallë më të madhe vështirësie sesa kualifikimet në Evropë.
“Me gjithë respektin e duhur, por ne nuk e kemi Azerbajxhanin në grup për të luajtur ndaj tij. Askush nuk ju jep pushim në kualifikimet e Amerikës së Jugut”, tha Tite.
Sebastian Abreu, sulmuesi i pensionuar, penalltia e të cilit “Panenka” në vitin 2010 vulosi fitoren që e çoi Uruguain në gjysmëfinale të Kupës së Botës për herë të parë në katër dekada, e këshilloi Mbappen “të përpiqej dhe të lexonte më shumë në Wikipedia”.
Ka shumë zhurmë në Amerikën e Jugut këto ditë, veçanërisht në Brazil, me Neymarin e disa sulmues tjerë të rinj dhe në Argjentinë, e cila ka një seri prej 35 ndeshjeve pa humbje dhe ka Messin që luan më mirë se kurrë me fanellën e përfaqësueses së tij. Uruguai beson se mund të shkojë larg me Luis Suarezin dhe Edinson Cavanin në Botërorin e tyre të katërt dhe me gjasë të fundit, së bashku me të rinj si Federico Valverde dhe Darwin Nunez. Ekuadori është rikthyer dhe të paktën dëshiron të avancojë nga një grup në të cilin do të luajë me Holandën, Senegalin dhe Katarin pritës.
Edhe
Evropa në Botëror do të testohet nga Brazili e Argjentina
Ata të gjithë duan të thyejnë kontrollin e Evropës në trofe. Por, ata janë gjithashtu të vetëdijshëm për një trend ogurzi: Kanë kaluar 20 vjet qëkur një ekip nga Amerika e Jugut fitoi Kupën e Botës. Qëkur Brazili fitoi titullin e tij të pestë në Japoni dhe Korenë e Jugut në vitin 2002, “Selacao” është eliminuar në këtë turne me t’u përballur me një ekip evropian në raundin e eliminimit, duke përfshirë humbjen poshtëruese 7:1 në shtëpi ndaj kampionit të ardhshëm Gjermanisë në vitin 2014. Argjentina ka arritur të mposhtë një ekip evropian në këto faza, por megjithatë përfundimisht dështoi, duke përfshirë humbjen nga Franca në 1/8 e finales në Rusi katër vjet më parë. Një faktor që ata theksojnë për “agjërimin” e gjatë të Kupës së Botës është se Evropa ka shumë para për të investuar në zhvillimin e lojtarëve të saj të rinj. Dhe së fundmi, pandemia dhe Liga e re e Kombeve e konceptuar nga UEFA ka ulur ndjeshëm numrin e ndeshjeve mes skuadrave më të mira nga Evropa dhe Amerika e Jugut.
“Evropianët po luajnë qartë me një shpejtësi të ndryshme nga ne. Ata janë në dimensionin që është shumë përpara lojtarit të Amerikës së Jugut”, tha Ivan Zamorano, një ish-sulmues i Kilit që luajti për Real Madridin dhe Interin.
Zamorano e ka zili kapacitetin që ka futbolli evropian për të gjetur lojtarë të talentuar që mund të “lënë gjurmë për të ardhmen”.
“Ekziston ende ajo aftësi individuale, cilësia e rrugës, që e bën lojtarin e Amerikës së Jugut unik”, tha Zamorano. “Por na mungojnë burimet, infrastruktura, metodat e punës së tyre. Kështu që, shanset për të zbuluar dhe zhvilluar atë fëmijë me aftësi unike janë më të vështira. Kjo është e shtrenjtë dhe shumë herë në Amerikën e Jugut humbet në rrugë”.
Por Zamorano thotë gjithashtu se kjo është hera e parë në të paktën tri Kupa Botërore që ai ka parë Argjentinën dhe Brazilin në një formë kaq të mirë pak para turneut. Luiz Felipe Scolari, trajneri i Brazilit që fitoi në vitin 2002, beson se dominimi aktual evropian është një fazë e drejtë. Ai tha se Brazili mund të fitojë në Katar, megjithëse ai mendon se vendi ka më shumë gjasa të sfidojë për titullin në vitin 2026, duke treguar potencialin e një numri të ri lojtarësh. Këtu përfshihet edhe Endrick, një sulmues 16-vjeçar që muajin e kaluar u bë golashënuesi më i ri për Palmeirasin në ligën braziliane.
“Këta fëmijë që luajnë tani mund të japin rezultatin që ne presim”, tha Scolari. “Por ju nuk mund t'i bëni presion që të japin gjithçka. Ndoshta në katër vjet ne mund t'i bëjmë presion që të japin gjithçka, sepse atëherë ata do të arrijnë majat në moshën 26, 27 vjeç”.
Edhe
Brazili frikësohet se mungesa e ndeshjeve me rivalët evropianë mund t’i kushtojë në Katar
Udhëheqësit e futbollit të Amerikës së Jugut po kërkojnë t'i mbajnë ekipet e tyre konkurruese. Alejandro Dominguez, presidenti i organizmit kontinental të futbollit CONMEBOL, shpreson të arrijë një marrëveshje me UEFA-n që do t'i lejojë ekipet nga Amerika e Jugut të luajnë në Ligën e Kombeve.
“Nuk është e lehtë të shkurtosh një hendek 30-vjeçar. Nuk janë thjesht tituj, por ekspertiza që është forcuar në Evropë dhe ajo që ne po përpiqemi të krijojmë në Amerikën e Jugut”, pranoi Dominguez. “Fatkeqësisht lojtarët tanë të rinj largohen shumë herët. Ne po përpiqemi të gjenerojmë më shumë të ardhura në mënyrë që klubet të mos jenë të dëshpëruar për t'i shitur ata”.
