(E përditësuar në 22:58) - Kylian Mbappe e pati besimin e trajnerit Carlo Ancelotti në ndeshjen e parë zyrtare me Real Madridin.
Dhe besimi i trajnerit italian u shpagua nga sulmuesi francez, i cili la gjurmë në trofeun e parë të sezonit të fituar nga madrilenët.
Mbappe ishte shënues i golit të dytë në minutën e 68-të në fitoren 2:0 të Real Madridit në Superkupën e Evropës ndaj Atalantas.
Në Superkupë luajnë fituesi i Ligës së Kampionëve dhe Ligës së Evropës.
Në fund, madrilenët nuk gabuan dhe triumfuan 2:0.
Për Realin ishte trofeu i gjashtë i fituar në Superkupën e Evropës.
Federico Valverde e shënoi golin e parë në minutën e 59-të me asistim të përkryer të Vinicius Juniorit, kurse Mbappe e shënoi golin që e vendosi sfidën.
Mbappe luajti deri në minutën e 83-të. Ai u transferua te Reali në këtë verë nga skuadra e Paris Saint-Germainit. Me parisienët, Mbappe kishte shënuar 256 gola, pasi ishte transferuar nga Monaco, skuadër me të cilën kishte realizuar 27 herë.
Mbappe me Francën ka 48 gola në total.
Berat Gjimshiti tek Atalanta e kompletoi ndeshjen.
Mbappe shënon golin e parë në debutim
Sulmuesi francez Kylian Mbappe ka debutuar me gol me fanellën e Real Madridit. Ai shënoi golin e dytë për Realin në minutën e 69-të.
Reali po fiton 2:0 ndaj Atalantas në Superkupën e Evropës. Ndeshja po luhet në Varshavë.
KYLIAN MBAPPÉ FIRST REAL MADRID GOAL! pic.twitter.com/ndYyLL5xA9
— TC (@totalcristiano) August 14, 2024
Pjesa e parë e Superkupës mbyllet baras
Pjesa e parë e Superkupës së Evropës ndërmjet Real Madridit dhe Atalantas është mbyllur pa gola.
Te fituesi i Ligës së Kampionëve, Real Madridi, debutoi në ndeshje zyrtare Kylian Mbappe, që iu bashkua madrilenëve në verë nga Paris Saint-Germaini.
Të dyja skuadrat patën rastet për të shënuar.
Atalanta e Berat Gjimshitit e qëlloi shtyllën me mesfushorin Marten de Roon në minutën e 25-të.
Në minutën e parë shtesë të pjesës së parë, i pafat ishte edhe Rodrygo, kur për pak sa nuk shënoi supergol. E qëlloi transversalen.
Ballafaqimi mes fituesit të Ligës së Kampionëve dhe Ligës së Evropës po zhvillohet në Varshavë.
Real Madridi e synon trofeun e gjashtë të Superkupës së Evropës, ndërsa Atalanta të parin.
