Festivali “Sunny Hill” do t’i rikthehet Prishtinës në fund të korrikut, kanë njoftuar vetë organizatorët të shtunën.
“Ruani datat! 25-28 korriku i takojnë ‘Festivalit Sunny Hill 2024’. Mezi që po ju presim që të shihni çfarë kemi bërë gati për ju”, thuhet në njoftim të “Sunny Hillit”.
Vitin e shkuar festivali nuk u mbajt për shkaqe që lidheshin me vendin ku qe paraparë të mbahej. Organizatorët patën thënë se hapësirat në fshatin Bërrnicë në Prishtinë nuk janë gati. E kjo pronë ishte bërë shkak i përplasjeve midis pushtetit lokal e atij qendror dhe organizatorëve të Festivalit.
Në dy edicionet e para, më 2018 dhe 2019 dhe më pas edhe më 2022 –pas dy vjetësh pauzë shkaku i pandemisë COVID19 – “Sunny Hill Festival” kishte sjellë emra të mëdhenj të botës në muzikë me në krye Dua Lipën. Numri i atyre që merrnin pjesë në koncerte shkonte mbi 15 mijë çdo natë dhe Gërmia qe bërë vend që nuk akomodonte publikun e interesuar për Festival. Qysh prej 2019-s organizatorët kanë kërkuar që t’u jepet në shfrytëzim një hapësirë për ta rritur Festivalin