Sean Penn merr “Oscarin” e improvizuar në Ukrainë pasi mungoi në ceremoninë zyrtare

Aktori i mirënjohur, Sean Penn ka marrë një çmim simbolik në formë “Oscari” në Ukrainë, i punuar nga metali i një vagoni treni të dëmtuar gjatë luftës, pasi mungoi në ceremoninë zyrtare të ndarjes së çmimeve nga Akademia e Filmit në Los Angeles të SHBA-së.

Në një video të publikuar nga Oleksandr Pertsovskyi, drejtor ekzekutiv i kompanisë shtetërore të hekurudhave të Ukrainës, e njohur si “Ukrainian Railways” (Ukrzaliznytsia), ai i thotë aktorit se pasi ka munguar në ceremoni ia improvizuan një “Oscar”.

“Po mungon në ‘Oscars’… prandaj ta bëmë këtë. Është nga një vagon i dëmtuar nga rusët”, thotë Pertsovskyi në videon e publikuar në BBC.

Penn, mbështetës i kahershëm i Ukrainës, kishte udhëtuar në vendin e përfshirë nga lufta në vend që të merrte pjesë në ceremoninë e “Oscars”.

Edhe Botë 16 kor 2026 Ministri i shkarkuar nga Zelensky flet për tensionet mes tij dhe komandantit të përgjithshëm të ushtrisë

Ai e ka fituar “Oscarin” e tretë për rolin në filmin “One Battle After Another”, duke u bërë një nga të paktët aktorë që kanë arritur këtë sukses, ka shkruar Deadline.

Presidenti i Ukrainës, Volodymyr Zelensky, e falënderoi publikisht.

“E dimë çfarë do të thotë një mik i vërtetë i Ukrainës. Ke qenë me ne që nga dita e parë e luftës”, ka shkruar Zelensky në llogarinë e tij në rrjetin social X.

Kjo nuk është hera e parë që Penn tregon mbështetje.

Edhe Botë 23 qer 2026 Zelensky bojkoton konferencën për Ukrainën për shkak të tensioneve me Poloninë

Në vitin 2022, ai i dhuroi një nga “Oscarët” e tij Zelenskyt dhe më pas realizoi dokumentarin “Superpower”, ku trajton historinë e luftës dhe rrugëtimin e presidentit ukrainas.

Në filmin e fundit, Penn luan përkrah emrave të njohur të Hollywoodit si Leonardo DiCaprio, Benicio Del Toro dhe Teyana Taylor.