Mbështete KOHËN. Ruaje të vërtetën
Botë

Ukraina dëmton rëndë urën strategjike që lidh Rusinë me Krimenë

ura e krimesë

Ukraina ka dëmtuar rëndë urën e Krimesë, një pikë kyçe që lidh Rusinë me gadishullin e pushtuar të Krimesë, në një sulm që presidenti ukrainas, Volodymyr Zelensky, e ka cilësuar si një “operacion të paprecedentë”, për të cilin ka thënë se ishte përgatitur për javë të tëra, shkruan BBC. 

Pamjet e publikuara nga zyrtarët ukrainas tregojnë se një pjesë e urës së Krimesë është shembur në ujë, duke i shkaktuar një goditje logjistike dhe simbolike përpjekjeve luftarake të Moskës.

Kremlini ka thënë se ura do të rindërtohet “më mirë se më parë”, ndërsa ka bërë të ditur se presidenti rus, Vladimir Putin, është informuar për sulmin gjatë natës.

Ura u ndërtua nga Rusia pas pushtimit dhe aneksimit të paligjshëm të Krimesë në vitin 2014 dhe u inaugurua personalisht nga Putini në vitin 2018.

Ukraina e ka shënjestruar prej kohësh urën e Krimesë, e cila shërben si rrugë automobilistike dhe hekurudhore për transportimin e trupave dhe pajisjeve ruse drejt vijës së frontit, por deri më tani Kievi nuk ka arritur ta nxjerrë përgjithmonë jashtë funksionit.

Ndërsa Kievi po përpiqet t’ia rrisë Rusisë koston ekonomike të luftës, përmes sulmeve ndaj rafinerive dhe depove të naftës, goditja e urës synon të rrisë edhe koston politike për Putinin.

Sulmi vjen në një moment të rëndësishëm, përpara takimeve të Putinit me liderët e Kinës dhe Shteteve të Bashkuara. Sulmi mund të ndikojë në mënyrën se si ai paraqitet në skenën ndërkombëtare.

Dëmet e shkaktuara nga sulmi gjatë natës, në të cilin u përdorën raketa dhe dronë, duket se janë shumë më të mëdha sesa në sulmet e mëparshme ndaj urës. Një pjesë e madhe e strukturës së harkuar të saj raportohet se është shkatërruar.

Videot e postuara nga Zelensky tregojnë dëme të rënda në pjesën rrugore të urës, ndërsa mbetje të harkut mbështetës dhe të trasesë rrugore shihen të dala mbi sipërfaqen e ujit.

VIDEO: