-
Përktheu:
Vita Abrashi-Kajtazi
- 5 dhjetor 2025 14:51
- Shpërndaje në:
Aktori 15-vjeçar Owen Cooper, i cili u bë i famshëm me rolin e tij në serialin hit të Netflix-it “Adolescence”, ka thënë se jeta në shkollë ka mbetur krejt normale, madje edhe arsimtarët ende i bërtasin, pavarësisht suksesit ndërkombëtar.
Owen, që do t’u nënshtrohet provimeve vitin e ardhshëm, u shpreh për revistën Dazed se fama nuk ka ndryshuar aspak mënyrën se si e trajtojnë shokët dhe mësuesit e tij.
“Shokët e mi s’janë fare të impresionuar. Më dërguan mesazhe ‘urime’, por nuk u intereson shumë. Mësuesit ishin ata që u çmendën, ata u gëzuan shumë. Por shokët e mi nuk shikojnë gjëra për mua në internet. Dhe jam i lumtur që nuk e bëjnë. Kur po xhiroja serialin, mendoja: ‘Po sikur të ndryshojnë të gjithë? Po sikur të ndryshojnë shokët e mi?’ Por ende më bërtasin arsimtarët dhe ende më tallin shokët. Gjithçka është në rregull. Jam i lumtur që s’kanë ndryshuar”, ka thënë ai.
Cooper pranoi se nuk e kishte imagjinuar kurrë që “Adolescence”, që ndjek historinë e Jamiet 13-vjeçar, i arrestuar si i dyshuar për vrasjen e një vajze nga shkolla, do të shkaktonte reagime kaq të forta. Madje kryeministri britanik, Sir Keir Starmer, e kishte quajtur serialin “shumë të vështirë për t’u parë”.
“Kur doli seriali, s’kisha asnjë ide çfarë të prisja. Mendoja se ndoshta do ta shikonin në Mbretërinë e Bashkuar, por ka prekur njerëz në mbarë botën. Në set askush nuk e priste që do shpërthente kështu. Kur nisën bisedat për spektaklin e ndarjes së çmimeve ‘Emmy’, ishte çmenduri. Askush nuk e kishte parë këtë të vinte”, ka thënë adoleshenti.
“Adolescence” u rendit numër 1 në listat e shikueshmërisë së Netflixit në 93 vende, dhe bashkë-krijuesi i serialit, Stephen Graham, që luajti edhe rolin e babait të Jamiet, Eddie, ka thënë për Variety se suksesi global i projektit i ka habitur të gjithë.
“Seriali u krijua si një histori e vogël britanike, dhe kjo ishte bukuria e tij. Nuk prisnim që të kapërcente kufijtë në këtë mënyrë, por ishte bërë me të vërtetë, me integritet, me respekt dhe shumë dashuri. Mendoj se kjo e kaloi kufirin. Ishte diçka që ndodh vetëm një herë në jetë. E kapëm frymën e kohës. Ishte numër 1 në Brazil? Numër 1 në Arabinë Saudite? Është e pabesueshme”, ka thënë Graham.