Një ish-shoqërues ka paditur Cassien për dëmet psikologjike që thotë se ia shkaktuan festat e P.Diddyt

Këngëtarja Cassie, emri i vërtetë i të cilës është Cassandra Ventura, po përballet me padi nga Clayton Howard, ish-shoqërues (eskortë) që ka ngritur akuza ndaj saj, duke pretenduar se ka pësuar dëme psikologjike nga pjesëmarrja në festat e ashtuquajtura “freak-offs” me Cassien dhe reperin P.Diddy, emri i vërtetë i të cilit është Sean Combs, ka shkruar TMZ.

Howard, i cili u përmend disa herë gjatë gjyqit penal të P.Diddyt, ka kundërshtuar pretendimin e Cassiet, se ai e kishte mbështetur publikisht pasi ajo ngriti akuzat kundër ish-partnerit të saj, P.Diddy.

Më herët, Cassie kishte paraqitur në gjykatë një mesazh që Howard ia kishte dërguar bashkëshortit të saj, Alex Fine.

“E di se e vërteta e gruas suaj është 100 për qind e saktë. Do të kisha dalë edhe unë publikisht dhe jam i lumtur që ajo mori një formë drejtësie”, thuhej në mesazh.

Megjithatë, në dokumentet e reja gjyqësore, Howard pranoi se e kishte dërguar mesazhin, por mohoi se kishte mbështetur plotësisht Cassien.

“Unë kurrë nuk kam thënë se Cassie ishte një viktimë e pafajshme që nuk kishte asnjë rol në këto ngjarje”, ka deklaruar ai.

Howard ka thënë se beson se Cassie ka qenë viktimë e P.Diddyt, por pretendon se ajo gjithashtu ka marrë pjesë në organizimin e “freak-offs”, të cilat sipas tij, i kanë shkaktuar dëme psikologjike. Ai ka theksuar se vetë Cassie kishte dëshmuar në gjykatë se kishte ndihmuar në koordinimin e këtyre festave.

Sipas Howard, qëndrimi i tij ndaj Cassiet ndryshoi pasi u bë publike se ajo kishte arritur një marrëveshje prej 20 milionë dollarësh me P.Diddyn për zgjidhjen e padisë së saj.