“Michael” thyen rekordin në arka filmike

Filmi i ri për ikonën e muzikës pop, Michael Jackson, ka thyer rekorde në arkat filmike, duke shënuar hapjen më të madhe ndonjëherë për një film biografik, ka raportuar BBC.

Filmi “Michael”, ku rolin e këngëtarit e luan nipi i tij Jaafar Jackson, ka grumbulluar rreth 217 milionë dollarë në nivel global vetëm në fundjavën e parë.

Traileri i filmit "Michael": 

Kjo shifër tejkalon rekordin e mëparshëm të mbajtur nga filmi “Bohemian Rhapsody”, ku Rami Malek interpretoi rolin e yllit Freddie Mercury, dhe që kishte debutuar me 124 milionë dollarë.

Filmi gjithashtu kaloi edhe suksesin e filmit “Oppenheimer”, duke u bërë hapja më e madhe për një biografi të çdo lloji.

“Nuk arrin këto shifra pa pasur një audiencë shumë të gjerë. Publiku po e shijon jashtëzakonisht shumë”, ka thënë Adam Gogelson nga kompania Lionsgate.

Megjithatë, reagimet kanë qenë të ndara.

Ndërsa publiku e ka vlerësuar shumë filmin, kritikët kanë qenë më skeptikë, duke e cilësuar si një version të “zbutur” të jetës së artistit.

Faqja Rotten Tomatoes ka treguar një diferencë të madhe: vetëm 38 për qind vlerësim nga kritikët, kundrejt 97 për qind nga publiku.

Filmi është pjesë e një trendi të suksesshëm të biografive muzikore në vitet e fundit, ku artistë si Elton John, Bob Dylan, Whitney Houston dhe Amy Winehouse kanë marrë trajtim kinematografik.

Filmi është financuar nga trashëgimia e artistit dhe përfshin vokalet origjinale të tij, duke u fokusuar kryesisht te muzika dhe performancat skenike.

Një element që ka ngjallur debat është fakti që filmi nuk përmend akuzat për abuzim seksual ndaj fëmijëve që janë bërë kundër Jacksonit.

Këngëtari gjithmonë i ka mohuar këto akuza dhe në vitin 2005 u shpall i pafajshëm në gjykatë.

Fillimisht, regjisorët kishin planifikuar të përfshinin këto çështje, përfshirë rastin e viteve ’90 me 13 vjeçarin Jordan Chandler, e ëma e së cilit e ka akuzuar yllin për sulm seksual, por kjo pjesë u hoq pas zbulimit të një marrëveshjeje konfidenciale që ndalonte përmendjen e tij në filma.

Regjisori Antoine Fuqua ka treguar se kjo gjë ka krijuar një periudhë të vështirë për ekipin.

“Ishte një moment i vështirë sepse duhej të rimendonim gjithçka”, ka thënë ai.

Si rezultat, filmi përfundon në vitin 1988, para se të nisnin akuzat, dhe fokusohet më shumë te karriera muzikore dhe marrëdhënia e tensionuar me babain e tij, Joseph Jackson.

Xhirimet shtesë e rritën buxhetin e filmit në rreth 200 milionë dollarë, duke e bërë një nga biografitë më të shtrenjta ndonjëherë.

Filmi ende nuk është shfaqur në Japoni, ku pritet të dalë në qershor, ndërsa suksesi i tij vjen në një moment kur interesimi për kinematë po rritet, falë filmave të mëdhenj të kohëve të fundit.

Michael Jackson mbetet një nga artistët më të mëdhenj në histori, me hite si “Billie Jean”, “Beat It”, “Smooth Criminal” dhe “Black or White”, ndërsa albumi i tij “Thriller” është më i shituri i të gjitha kohërave.