-
Përktheu:
Vita Abrashi-Kajtazi
- 10 dhjetor 2024 09:45
- Shpërndaje në:
Çifti i njohur, këngëtarët, Jay-Z dhe Beyonce, u shfaqën përkrah vajzës së tyre, Blue Ivy, në premierën e filmit “Mufasa: The Lion King”, ku luajnë këngëtarja dhe vajza. Premiera është mbajtur vetëm një ditë pasi Jay-Z u përmend në një padi se bashkë me reperin P.Diddy kishin sulmuar seksualisht një 13 vjeçe në vitin 2000.
Familja u shfaq e bashkuar në premierën e filmit, ku Beyonce ka huazuar zërin për rolin e Nalas, kurse Blue Ivy zërin për rolin e Kiaras, vajzës së Nalas e Simbas, në filmin e animuar të krijuar nga kompania “Disney”, ka raportuar Variety.
55 vjeçi me 43 vjeçen ishin shumë të buzëqeshur ndërkohë që me ta ishte edhe nëna e krijueses se hitit “Halo”, Tina Knowles, 70 vjeçe, në mbështetje të Ivyt.
Të dielën, gruaja, identiteti i të cilës nuk është bërë publik, kishte ngritur padi kundër P.Diddyt në muajin tetor, dhe në atë padi kishte përfshirë edhe një person të famshëm tjetër të cilit i është referuar si "i famshmi A".
Të dielën është raportuar se personi A, është reperi i famshëm Jay-Z, emri i të cilit është Sean Carter.
Carter është i famshmi i parë që akuzohet për sulm seksual në lidhje me çështjet e Combsit.
Përmes një deklarate dhënë për mediumin CNN, Carter i ka quajtur akuzat "të neveritshme". Ai ka ftuar paditësen "të bëjë kallëzim penal e jo civil”.
“Kushdo që do të kryente një krim të tillë kundër një të mitureje duhet të mbyllet në burg, a nuk do të pajtoheshit?”, ka thënë Jay-Z.
Paditësja gjithashtu akuzon Carterin se ka organizuar një konspiracion për të shantazhuar e kërcënuar avokatët e palës paditëse, familjet, punonjësit dhe ish-bashkëpunëtorët e tyre, me qëllim që ata të heshtnin dhe të mos përmendnin Carterin në rastin ligjor.
Në përgjigjen e tij, Carter e ka quajtur kërkesën për ndërmjetësim “përpjekje shantazhimi”.
Ai gjithashtu kritikon avokatin e palës paditëse, duke thënë se ai ka një histori të ngjashme me “shfaqje teatrale” në raste të tjera ligjore.
“Gruaja ime dhe unë duhet t'i ulim fëmijët e të flasim me ta, shokët e njërit nga të cilët, do ta shohin shtypin e të pyesin atë për natyrën e këtyre pretendimeve, e ne t'ua shpjegojmë ligësinë e lakminë e njerëzve ... Fëmijët nuk kanë nevojë të përballen me diçka të tillë në moshë kaq të re”, ka thënë Carter, duke shtuar se i është “thyer zemra” pasi familja duhet të përballet më këtë gjë.
Ndërkohë një personalitet i njohur (emri i të cilit nuk është bërë publik deri më tash) ka ngritur padi ndaj avokatit Tony Buzbee dhe firmës së tij, duke i akuzuar ata për përpjekje për të shantazhuar dhe për të kërkuar shuma të mëdha parash në këmbim të mos ngritjes "së akuzave të rreme dhe të tmerrshme ndaj tij".
I famshmi pretendon se Buzbee dhe ekipi i tij kërcënuan të shpallnin akuza të rreme për sulme seksuale, duke përfshirë raste të përdhunimit të të miturve, nëse ai nuk i plotësonte kërkesat e tyre.
Avokati Buzbee e ka mohuar akuzën për shantazh dhe përmes një postim në Instagram ka thënë se firma e tij nuk do të lejojë që avokatët e fuqishëm dhe të pasur të shantazhojnë ose të heshtnin për viktimat e sulmeve seksuale.
