-
Përktheu:
Vita Abrashi-Kajtazi
- 28 nëntor 2025 23:40
- Shpërndaje në:
Emma Heming-Willis ka thënë se festat e fundvitit me bashkëshortin e saj, aktorin e njohur, Bruce Willis, mbeten të gëzueshme, pavarësisht diagnozës së tij me demencë frontotemporale (FTD) në vitin 2023.
Modelja 47-vjeçare rrëfeu për People se Krishtlindjet qe dy vjet kanë marrë një formë tjetër, por dashuria për festat mbetet e njëjta.
Hemming Willis, e cila ka dy vajza me aktorin, Mabel, 13 vjeçe dhe Evelyn, 11 vjeçe ka thënë se festat janë periudhë e gëzueshme.
“Është e gëzueshme. Thjesht është ndryshe. Bruce i donte shumë Krishtlindjet dhe ne duam t’i festojmë me të. Thjesht duken ndryshe, ndaj jemi përshtatur”, ka thënë ajo.
Ajo ka pranuar se periudha e festave mund të jetë “shumë e vështirë” për familjet që përballen me demencën, edhe pse me humor ka shtuar se njerëzit duhet “të shikojnë filmin ‘Die Hard’, sepse është film i Krishtlindjeve”.
“Duhet të mësosh, të përshtatesh dhe të krijosh kujtime të reja, duke mbajtur gjithashtu disa nga traditat e vjetra. Jeta vazhdon. Demenca është e vështirë, por ka ende gëzim në të. Është e rëndësishme të mos e pikturojmë gjithmonë kaq negativisht. Ne ende qeshim. Ka ende gëzim. Thjesht duket ndryshe”, ka thënë Hemming-Willis.
Ajo ka treguar se jeta me Willisin, 70 vjeç, është shumë e thjeshtë.
“Jeta është shumë e thjeshtë – ka qenë gjithmonë e tillë. Mendoj se të jesh e pranishme me të, kjo është lumturia. Unë të jem gruaja e tij, pranë tij. Këto janë momentet”, ka thënë ajo.
Së fundmi, Hemming-Willis ka folur edhe për vështirësitë që përjetuan në ditën kur morën diagnozën e FTD-së.
“Ditën kur morëm diagnozën, dolëm nga ajo vizitë pa asgjë, pa shpresë, pa drejtim, pa mbështetje. Nuk më dhanë asnjë informacion, përveç disa të dhënave bazë për FTD. Kur e mendoj tani, më duket e çmendur. Ishte një përvojë traumatike, sikur të të shkatërrohej jeta përnjëherë”, pati thënë ajo për Yahoo.
Ajo ka shtuar se më pas filloi kërkimet vetë, për të kuptuar çfarë nënkupton sëmundja dhe si ndikon te familja
“Vitet e para janë shumë të vështira sepse po përpiqesh t’i kuptosh gjërat në kohë reale. Është sëmundje progresive. Në fillim, njeriu yt ende mund të menaxhojë disa gjëra, pastaj ngadalë nevojat ndryshojnë dhe gjërat që dikur i bënte, nuk mund t’i bëjë më. Duhet të rrisësh nivelin e mbështetjes”, pati thënë Hemming-Willis.