DEA përfshihet në hetimin për vdekjen e Hayden Panettiere

Administrata Amerikane për Luftën kundër Drogës (DEA) është përfshirë në hetimin për vdekjen e aktores Hayden Panettiere, raportojnë The New York Times dhe ABC News, duke cituar burime pranë hetimit.

Panettiere, 36 vjeç, u gjet pa ndjenja të dielën në një apartament në Greenville, Karolina e Jugut. Ekipet e emergjencës e gjetën në arrest kardiak dhe, pavarësisht përpjekjeve për ta rikthyer në jetë, ajo u shpall e vdekur në vendngjarje.

Në një telefonatë të emergjencës përmendet mundësia e një mbidoze, por autoritetet ende nuk kanë konfirmuar se vdekja lidhet me mbidozën. Shkaku dhe mënyra e vdekjes nuk janë përcaktuar ende dhe priten rezultatet e analizave toksikologjike.

Autopsia nuk zbuloi shenja traume që mund të kishin shkaktuar vdekjen.

Zyrtarët policorë kanë deklaruar se i dashuri i saj, Brian Hickerson, dhe vëllai i tij, Zach Hickerson, telefonuan 911 pasi e gjetën aktoren pa shenja jete. Sipas raportit të policisë, Brian i tregoi një zyrtari të policisë edhe një qese me ilaçet e Panettiere, ndërsa pjesë të raportit, përfshirë listën e ilaçeve, janë redaktuar.

Hayden Panettiere kishte folur publikisht për betejat e saj me varësinë dhe depresionin pas lindjes. 

Në muajt e fundit, ajo kishte shprehur dëshirën për të nisur një kapitull të ri në jetën e saj dhe ka njoftuar se po rikthehej në ekran.

Edhe Showbiz 9 pri 2026 “Mbretëresha e Ketaminës” në rastin e Matthew Perryt dënohet me 15 vjet burg

Ish-partneri i saj dhe babai i vajzës së tyre, ish-kampioni ukrainas i boksit Wladimir Klitschko, ka reaguar me një mesazh prekës.

“Familja jonë po kalon një periudhë tronditjeje dhe dhimbjeje të thellë. Ajo ndërtoi një karrierë të jashtëzakonshme falë talentit të madh, ndërsa përballej edhe me anët e errëta të një industrie shumë kërkuese”, ka shkruar ai.

Hetimi vazhdon dhe shkaku përfundimtar i vdekjes pritet të bëhet i ditur pas përfundimit të analizave toksikologjike.