Rep artistja e njohur amerikane Cardi B, e ka shënuar suksesin e radhës në muzikë duke u bërë reperja e vetme, albumi i së cilës ka qëndruar më së gjati në historinë e toplistës “Billboard 200”.
Ylli i hitit “WAP” e ka festuar thyerjen e këtij rekordi të shënuar me albumin debutues “Invasion of Privacy”, duke i falënderuar adhuruesit e saj për mbështetjen e vazhdueshme.
Ajo po ashtu i ka ngacmuar fansat duke thënë se po punon shumë për t’u siguruar që albumi i dytë, të jetë edhe më i mirë dhe suksesshëm.
“Është ndjenjë shumë e mirë! Faleminderit të gjithëve që më përkrahni dhe vazhdoni t’i dëgjoni këngët e albumit ‘Invasion of Privacy’. Aktualisht jam duke punuar rreth albumit tim të dytë i cili po merr pak më shumë kohë, por dua të sigurohem që ta realizoj një projekt të mahnitshëm,” kishte shkruar Cardi B në mesazhin e saj të postuar në Instagram.
Nuk dihen shumë detaje rreth këtij incizimi, por në muajin maj ylli i hitit “I Like It” e ndau me ndjekësit e saj në rrjetet sociale një klip të shkurtër të këngës së parë nga albumi i ri dhe ende i patitulluar, i cili vjen pas atij të vitit 2018 “Invasion of Privacy”.
Cardi ka punuar rreth albumit të radhës përgjatë karantinës, duke e ndarë kohën edhe për vajzën e saj dy vjeçare, Kulture, të cilën e ka me reperin Offset.
Infromatat e reja rreth incizimit të ri vijnë pak kohë pasi Cardi B e publikoi bashkëpunimin e saj me reperen, Megan Thee Stallion. Kënga me titull “WAP” i numëron gjithsej 134 milionë klikime në YouTube.
