Këngëtari R. Kelly, 55 vjeç, do të dalë sërish para gjykatës me akuzën se posedonte imazhe të abuzimit seksual të fëmijëve.
Seanca e planifikuar më 15 gusht, do të shënojë gjykimin e dytë ku ai përballet me akuza të lidhura me imazhe të tilla, pasi ai u lirua më parë në vitin 2008 për akuza të ngjashme.
Kelly - emri i vërtetë i të cilit është Robert Sylvester Kelly, është deklaruar i pafajshëm.
Kjo vjen pasi superylli i viteve ‘90 i muzikës R&B u dënua të mërkurën me 30 vjet burgim nga Gjykata e Qarkut të SHBA-së në New York për organizimin e një skeme për të joshur dhe shfrytëzuar seksualisht këngëtarët e rinj aspirues dhe miturit.
Një nga viktimat e tij, e identifikuar vetëm me emrin e saj të parë Sonja, e ka përshëndetur dënimin e këngëtarit. Ajo ka thënë për “Los Angeles Times” se ka duruar vite të tëra të frikësimit nga njerëzit në rrethin e këngëtarit.
R. Kelly u dënua vitin e kaluar nga një juri për akuza të shumta të shantazhit, në lidhje me ryshfet dhe punë të detyruar.
Këngëtari, i cili mohoi të gjitha akuzat dhe planifikon të apelojë dënimin e tij 30-vjeçar, u shpall fajtor për të nëntë akuzat kundër tij pas një gjyqi gjashtë-javor në Brooklyn dhe nuk u duk se reagoi teksa dënimi i tij u kumtua.
