Ish-modelja e njohur shqiptare me famë botërore, Emina Çunmulaj, është shtatzënë me fëmijën e tretë të cilin e ka me bashkëshortin, Sam Nazarian.
36-vjeçarja e famshme e bëri publik lajmin e lumtur me postimin e një fotografie në Instagram, ku ajo shfaqet në një jahtë përkrahë 2 vajzave të saj, Ella dhe Mia, me ç’rast e zbulon barkun tashmë të fryrë dhe gjininë e foshnjës së tretë, që është djalë.
“Një djalë i vogël është rrugës dhe të gjithë ne po ndihemi jashtëzakonisht të lumtur”, shkuhej në mesazhin përcjellës të fotografisë.
Çunmulaj gjithmonë e ka shprehur dëshirën për ta pasur një familje të madhe dhe me shumë fëmijë, sikur ajo në të cilën është rritur.
Bukuroshja e njohur edhe për angazhimet në fushën e bamirësisë, vazhdimisht e promovon kulturën shqiptare tek 342 mijë ndjekësit e saj në Instagram, duke filluar nga veshjet tradicionale, ushqimet të cilat i përgatit edhe për familjen e saj në Amerikë, muzikën shqiptare që e shoqëron pothuajse çdo ditë dhe shumëçka tjetër.
Emina Çunmulaj është e martuar me biznesmenin miliarder me prejardhje nga Irani, Sam Nazarian, nga viti 2015. Së fundmi ata e festuan 11-vjetorin që janë në lidhje dhe që të dy shquhen si një çift i cili e ruan me çdo kusht privatësinë e familjes së tyre.
