Yjet që siguruan vendin e parë për SHBA-në

Vëmendja në Lojërat Olimpike të Parisit ishte te Simone Biles që bëri rikthim sensacional, ndërsa të gjithë shikonin shfaqjen e saj brenda dhe jashtë arenave të gjimnastikës. 

Të gjithë sytë ishin te Biles që fitoi katër medalje, por shumë emra të rinj e fytyra të reja dolën në pah. 
Lojërat Olimpike do të mbahen mend për arenat e skenat që lanë shumë kë pa frymë. 

Në Olimpiadën “Parisi 2024”, “breakdance” debutoi si sport olimpik. 

Notari francez, Leon Marchand, bëri shfaqje të ngjashme në shtëpi si ato të Michael Phelpsit, duke i fituar pesë medalje në total. Katër prej tyre ishin të arta. 

Noah Lyles e fitoi epitetin e njeriut më të shpejtë në botë pas triumfit në garën e vrapimit 100 metra.

Ai, megjithatë, përfundoi në vendin e tretë në 200 metra vrapim. Dështoi ta fitonte disiplinën në të cilën nuk ishte humbje tash e tre vjet, që nga “Tokio 2020”. Pas garës njoftoi se ishte me COVID. 

Sha’Carri Richardson shkëlqeu në stafetën 4x100 metra me ekipin e Shteteve të Bashkuara të Amerikës, pasi e fitoi të argjendtën në 100 metra vrapim. 

Shtetet e Bashkuara të Amerikës dolën të parat në listën përfundimtare të medaljeve. Kjo u arrit në ditën e fundit. Ekipi i basketbollisteve triumfoi ndaj Francës në finale.

E arta Biles

Superylli amerikan, Simone Biles, u kthye në Lojëra Olimpike pasi u tërhoq nga disa gara të Lojërave Olimpike në Tokio për shkak të shëndetit mendor. I fitoi katër medalje, prej të cilave tri ishin të arta. 

Ajo mori vëmendjen e të gjithëve në Paris dhe garoi në salla të mbushura plot me tifozë. Platforma televizive që i transmetoi garat e Lojërave Olimpike ka thënë se 34.7 milionë njerëz e kanë ndjekur Bilesin. 

Ajo vlerësohet njëra prej gjimnasteve më të mira të të gjitha kohëve.

Telashet e amerikanëve në not

Nëntë ditët e garave të notit ishin shumë të vështira për amerikanët, që mezi e morën kryesimin në renditjen e medaljeve në këtë sport. Atyre iu desh një fitore në garën e fundit për të dalë në vendin e parë. 

Shtetet e Bashkuara të Amerikës përfunduan me tetë medalje të arta në not, më së paku që prej Lojërave Olimpike “Seul 1988”.

SHBA-ja kishte vetëm një medalje të artë më shumë sesa Australia, që ishte rivalja më e madhe e saj. 

“Është njëra prej paraqitjeve më të dobëta në histori për ekipin e SHBA-së”, ka thënë Phelps, olimpisti më i dekoruar në histori.

Pjesa tjetër e shteteve pati 20 fitore, më shumë sesa Shtetet e Bashkuara të Amerikës dhe Australia së bashku. Është hera e parë që ndodh kjo që prej Lojërave Olimpike “Atlanta 1996”.

Dominimi në atletikë

Shtetet e Bashkuara të Amerikës patën 34 medalje gjithsej në atletikë, ndërsa 14 prej tyre ishin të arta. Amerikanët ishin më të mirët në “mbretëreshën e sporteve”. 

Dhe kjo u arrit pavarësisht dështimit të Richardsonit që nuk e fitoi të artën në garën e vrapimit 100 metra, humbjes së Lylesit në 200 metra edhe pse ishte me koronavirus, si dhe diskualifikimit në stafetën 4x100 metra. 

SHBA-ja megjithatë arriti të vendosë rekorde. 

Sydney McLaughlin-Levrone vendosi tjetër rekord botëror në triumfin në vrapimin 400 metra me pengesa. Ajo më pas ishte pjesë e ekipit të stafetës 4x400 metra. Bashkë me Gabby Thomasin udhëhoqën ekipin e SHBA-së në triumfin e natës finale në “Stade de France”. 

Edhe atletët e SHBA-së e fituan medaljen e artë në këtë garë.

Tjetër triumf në basketboll

Stephen Curry edhe një herë tjetër shfaqi potencialin që e ka, dhe më në fund e fitoi medaljen e artë olimpike. 

Curry shënoi 24 pikë dhe e udhëhoqi SHBA-në në fitoren 98:87 kundër Francës, në turneun olimpik të basketbollit. Ishte medalja e pestë rresht e artë për basketbollistët amerikanë dhe e 17-ta në 20 paraqitje për SHBA-në në Lojërat Olimpike. 

Kevin Durant, medalisti i katërfishtë i artë, dhe i pari në historinë e Olimpiadave që e arrin këtë sukses në basketboll, shënoi 15 pikë, aq sa pati edhe Devin Booker. Ndërkohë, LeBron James, i cili pati mbathur këpucë me shkëlqim ari, shënoi 14 pikë. E fitoi medaljen e katërt olimpike dhe të tretën me shkëlqim ari.

Amerikanet, sërish të parat në futboll

Ekipi i futbollisteve të SHBA-së e fitoi medaljen e pestë të artë olimpike, pas fitores 1:0 ndaj Brazilit në finale. Amerikanet nuk e kishin fituar medaljen e artë që prej Lojërave Olimpike “Londra 2012”. 

E arta olimpike u arrit nën drejtimin e selektores së re, Emma Hayes, që debutoi në krye të amerikaneve.

Diskutimet për boksin

Boksi i grave është përfshirë në një debat të gjerë për dy boksieret për të cilat kishte dyshime nëse duhej të lejohen të merrnin pjesë në turneun olimpik.

Imane Khelif e Algjerisë dhe Li Yu-ting e Tajvanit vitin e kaluar ishin përjashtuar nga Kampionati Botëror nga Asociacioni Ndërkombëtar i Boksit (IBA), me arsyetimin se kishin dështuar në testin për kromozome. IBA kishte përmendur edhe papërshtatshmërinë gjinore të tyre. 

Khelifi i rezistoi abuzimit që iu bë nga e gjithë bota dhe e fitoi medaljen e artë në kategorinë uelter. 

Edhe Lin e fitoi medaljen e artë në kategorinë deri në 57 kilogramë, ndërsa për Tajvanin ishte medalja e parë olimpike e artë e fituar në boks. 

“Unë jam grua, njësoj si çdo grua tjetër. Kam lindur e tillë, kam jetuar si grua”, ka thënë Khelif pas fitores. 

Komiteti Olimpik Ndërkombëtar vitin e kaluar ia hoqi njohjen IBA-s për “dështimin për të zbatuar reformat në qeverisje dhe financa”.