U diskualifikuan nga Botërori pasi u tha se dështuan në testin e gjinisë, por po marrin pjesë në Paris

Gra në pasaportat e tyre, gra edhe në Lojërat Olimpike “Paris 2024”. 

Komiteti Olimpik Ndërkombëtar të martën ka mbrojtur të drejtën e dy boksiereve për të marrë pjesë në Lojërat Olimpike, ani pse ato vitin e kaluar kishin dështuar ta kalonin testin e gjinisë dhe u diskualifikuan nga kampionati botëror, raporton agjencia “AP”.  

Lin Yu-Ting nga Tajvani, që është kampione e dyfishtë botërore, dhe Imane Khelif e Algjerisë po marrin pjesë për herë të dytë në Lojërat Olimpike. 

“Të gjitha që marrin pjesë në kategorinë e grave janë në përputhje me rregulloret”, ka thënë zëdhënësi i IOC-së, Mark Adams të martën në konferencë për media. “Ato janë gra në pasaportat e tyre dhe është thënë se kështu është, se janë gra”. 

Në Botërorin 2023 në New Delhi, të dyja ishin parashikuar të fitonin medalje para se të diskualifikoheshin nga Asociacioni Ndërkombëtar i Boksit (IBA). IBA nuk drejton boksin olimpik pas mosmarrëveshjeve disavjeçare me Komitetin Olimpik Ndërkombëtar (IOC). 

Boksi në Lojërat Olimpike në Paris drejtohet nga zyrtarët të caktuar nga IOC-ja, që të hënën thanë se po përdorin rregulloret që ishin edhe për Lojërat Olimpike të vitit 2016 në Rio dhe ato të “Tokio 2020”. 

Edhe Paris 2024 4 gus 2024 Boksierja e shumëpërfolur tajvaneze siguron medaljen olimpike

“Ato kanë të drejtë të garojnë sipas rregulloreve të federatës që u caktuan në vitin 2016, dhe ato u aplikuan edhe në Tokio në vitin 2020. Të garojnë si gra, që edhe janë. Ne e përkrahim plotësisht këtë”, tha Adams. 

Lin është bartëse e parë në kategorinë deri 57 kg ndërsa Khelif është bartëse e pestë në kategorinë deri 66 kg. 

Lin u kualifikua në Paris duke fituar titullin në Lojërat e Azisë në tetor të vitit të kaluar dhe Khelif fitoi turneun kualifikues në Afrikë shtatorin e kaluar. Të dy turnetë u mbajtën nën autoritetin e IOC-së muaj pasi që boksierët u diskualifikuan nga IBA.