Nis peticioni për vendosjen e shtatores së Adem Jasharit në Prishtinë

Grupimi i tifozëve kryeqytetas, “Plisat”, kanë paralajmëruar se nga e premtja do të nisë peticioni për vendosjen e shtatores së komandantit të Ushtrisë Çlirimtare të Kosovës, Adem Jashari, në Prishtinë.

“Plisat” përmes një shkrimi në Facebook kanë treguar se tenda për nënshkrimin e peticionit do të vendoset afër shtatores së Skenderbeut nga dita e nesërme.

“Të shkruash për komandantin legjendar Adem Jashari dhe familjen Jashari është privilegj, por edhe përgjegjësi e madhe. Vepra dhe sakrifica e familjes Jashari është një vepër unike, vepër e cila ka sensibilizuar shumë bashkatdhetarë të tjerë t'i bashkangjiten Ushtrisë Çlirimtare të Kosovës që ne të gëzojmë këtë liri që kemi sot”, thuhet tutje në njoftimin e “Plisave”.