Testi që mund të parashikojë se cili trajtim për kancerin e gjirit është i duhuri

Një test i thjeshtë gjaku mund të parashikojë se cili trajtim për kancerin e gjirit do të funksionojë më mirë për secilin pacient, sipas një studimi të ri shkencor.

Shkencëtarët nga Institute of Cancer Research (ICR) në Londër kanë zhvilluar një test ADN-je, të quajtur “biopsi e lëngshme”, i cili analizon ADN-në e tumorit që qarkullon në gjak. Ky test mund t’u tregojë mjekëve, që në fillim të trajtimit ose pas vetëm katër javësh, nëse terapia e zgjedhur do të jetë efektive, ka raportuar The Guardian.

Më shumë se 2 milionë njerëz në botë diagnostikohen çdo vit me kancer të gjirit. Ani pse trajtimet janë përmirësuar, ende është e vështirë të dihet se cili trajtim i përshtatet më së miri secilit pacient.

Testi i ri mat nivelet e ADN-së së tumorit në gjak, të njohura si ctDNA, të cilat çlirohen nga qelizat kancerogjene. Studiuesit kanë analizuar mostra gjaku nga 167 pacientë me kancer të avancuar të gjirit, para fillimit të trajtimit dhe pas një cikli të vetëm trajtimi, katër javë më vonë.

Rezultatet treguan se pacientët me nivele të ulëta të ctDNA-së në fillim kishin më shumë gjasa t’i përgjigjeshin mirë trajtimit.

“Studimi ynë tregon se një test i thjeshtë gjaku që mat ADN-në e tumorit mund të parashikojë herët nëse kanceri i gjirit do t’i përgjigjet trajtimit”, ka thënë autorja kryesore e studimit, mjekja Iseult Browne nga ICR.

Ajo ka shtuar se ky informacion është shumë i rëndësishëm për pacientët.

“Nëse e dimë këtë që në fillim, ose pas vetëm katër javësh, mund të shmangim dhënien e barnave që nuk funksionojnë dhe t’u ofrojmë pacientëve alternativa të tjera, përpara se kanceri të përparojë”, ka thënë Browne.

Pacientët u ndanë në dy grupe. Grupi i parë përfshinte persona me kancer gjiri që kishin mutacione specifike dhe morën trajtime të synuara. Grupi i dytë përfshinte pacientë me kancer të trefishtë negativ të gjirit, një formë agresive që përbën rreth 10-15 për qind të rasteve dhe nuk ka trajtim të synuar.

Në grupin e dytë, pacientët me nivele të ulëta të ctDNA-së para trajtimit kanë jetuar mesatarisht 10.2 muaj pa përparim të sëmundjes, krahasuar me vetëm 4.4 muaj te ata me nivele të larta. Rreth 40 për qind e tyre kanë reaguar pozitivisht ndaj trajtimit, ndërsa vetëm 9.7 për qind e pacientëve me nivele të larta të ctDNA-së kanë parë përmirësim.

Edhe pas katër javësh trajtim, rezultatet ishin të qarta: pacientët te të cilët ctDNA-ja nuk ishte më e dallueshme kishin rezultate shumë më të mira dhe kanceri qëndronte nën kontroll për më gjatë.

“Ne gjetëm një lidhje të qartë mes niveleve të ADN-së së tumorit në gjak dhe mënyrës se si pacientët reagojnë ndaj terapisë. Këto gjetje mbështesin përdorimin e këtij testi si një mënyrë jo-invazive për të parashikuar dhe monitoruar suksesin e trajtimit”, ka thënë Browne.

Profesori Nicholas Turner nga ICR ka theksuar se potenciali i këtij testi shkon edhe më tej.

“Ky studim u fokusua në kancerin e avancuar të gjirit, por teste të tilla mund të funksionojnë edhe për fazat e hershme të sëmundjes”, ka thënë ai.

Sipas tij, kjo biopsi e lëngshme “ka potencialin t’i bëjë vendimet për trajtim më të shpejta, më të personalizuara dhe, në fund, më efektive”.