-
Përktheu:
Vita Abrashi-Kajtazi
- 2 maj 2025 14:55
- Shpërndaje në:
Një studim i ri nga Universiteti i Teksasit sugjeron se simptomat që shfaqen pas kalimit të COVID-19 janë më të ndryshme dhe zgjasin më gjatë krahasuar me ato që vihen re pas gripit apo pneumonisë. Hulumtimi u botua në revistën PLOS One dhe analizoi të dhënat shëndetësore të mbi 121 mijë pacientëve që e kishin kaluar COVID-19, si dhe grupe krahasuese me 20,844 pacientë me grip dhe 29,052 me pneumoni, të diagnostikuar para pandemisë, ka raportuar CIDRAP.
Simptomat më të shpeshta pas COVID-it
Sipas studimit, simptomat më të zakonshme që vazhduan më shumë se 4 javë pas infektimit me COVID-19 ishin:
lodhja (25.4%)
vështirësia në frymëmarrje (24.7%)
dhimbjet e kyçeve (24.7%)
Ndërkohë, te pacientët me grip, simptomat më të shpeshta që zgjatnin ishin:
dhimbje kyçesh (19.8%)
lodhje (18.2%)
kollë (17.7%)
Te të sëmurët me pneumoni, simptomat që zgjatën më shumë ishin:
vështirësia në frymëmarrje (42.2%)
lodhje (34.8%)
kollë (33.9%)
Sëmundjet e tjera që shtojnë rrezikun
Pacientët që kishin sëmundje kronike kishin më shumë gjasa të përjetonin simptoma pas infektimit me COVID-19. Rreziku ishte më i lartë te ata me: artrit reumatoid, sëmundje të zemrës dhe astmë.
Sa më e rëndë sëmundja, aq më të zgjatura simptomat
Studiuesit vunë re se vetëm rastet më të rënda të COVID-19 vazhdonin të kishin simptoma pas disa muajsh. Tek ata me nivel rëndese 8 (më i larti), gjasat për të pasur lodhje pas 4 javësh ishin 3.32 herë më të larta krahasuar me ata me COVID më të lehtë (niveli 3). Ndërsa vështirësia në frymëmarrje ishte 3.07 herë më e shpeshtë.
“Me kalimin e kohës, intensiteti i simptomave zbehet”, kanë deklaruar autorët e studimit.
Sipas tyre, simptomat pas-COVID nuk mund të shpjegohen plotësisht nga ajo që është parë më parë me gripin apo pneumoninë.
Studiuesit kanë thënë se kanë identifikuar ndryshime të qarta në frekuencën e simptomave dhe kohën që duhet për t’u zhdukur, duke i përshkruar simptomat që zgjasin pas COVID-it si një gjendje unike.
