Nuhatja e çokollatës para ushtrimeve mund të përmirësojë performancën

Nëse bëni ushtrime me stomak bosh, ndoshta nuk keni nevojë për një suplement para ushtrimeve. Sipas një studimi të ri nga studiues në Malajzi, vetëm nuhatja e çokollatës, pa e ngrënë atë, mund të ndihmojë në përmirësimin e performancës fizike, ka shkruar The New York Post.

Në studim morën pjesë 23 të rinj, të cilët u ndanë në tri grupe.

Njëri grup nuhati çokollatë të zezë me 90 për qind kakao, grupi i dytë çokollatë qumështi me 60 për qind kakao, ndërsa grupi i tretë vetëm ujë. Më pas ata kryen ushtrime për muskujt e këmbëve.

Rezultatet treguan se ata që nuhatën çokollatën e zezë arritën të bënin mesatarisht 18 përsëritje më shumë, ndërsa ata që nuhatën çokollatë qumështi bënë rreth 9 përsëritje shtesë.

Pavarësisht kësaj, pjesëmarrësit nuk ndienin se po lodheshin më shumë.

Studiuesit zbuluan gjithashtu se aroma e çokollatës së zezë uli ndjesinë e urisë dhe rriti ndjenjën e ngopjes.

“Aroma e çokollatës së zezë e mashtron trurin, duke krijuar paraprakisht ndjesinë e ngopjes, sikur organizmi të kishte konsumuar një ushqim të pasur”, ka shpjeguar autori kryesor i studimit, Mohamed Nashrudin bin Naharudin

Sipas tij, çokollata nuk është domosdoshmërisht unike në këtë efekt.

“Mendojmë se edhe aroma e ushqimeve të tjera mund të ketë ndikim të ngjashëm. E rëndësishme është që aroma të jetë e njohur dhe e këndshme për personin, në mënyrë që të ndikojë në oreks dhe performancë”, ka thënë ai.

Studiuesit theksojnë se kjo metodë mund të jetë e dobishme për ata që bëjnë ushtrime herët në mëngjes ose gjatë agjërimit me ndërprerje, kur nuk dëshirojnë të hanë para ushtrimeve. Megjithatë, ata theksojnë se nuhatja e çokollatës nuk zëvendëson një ushqyerje të shëndetshme, por mund të shërbejë si një ndihmë psikologjike për të rritur performancën gjatë ushtrimeve.