-
Përktheu:
Vita Abrashi-Kajtazi
- 25 korrik 2025 23:45
- Shpërndaje në:
Ruajtja e nivelit të duhur të tensionit të gjakut është një nga mënyrat më të rëndësishme për të mbrojtur zemrën, për të parandaluar sëmundjet kardiovaskulare, sulmet në tru dhe probleme të tjera serioze me shëndetin.
Kur bëhet fjalë për mënyrat si ta mbahet nën kontroll tensioni i gjakut, zakonisht mendohet rreth ushqimit ë shëndetshëm dhe aktiviteti fizik. Rutina para gjumit ka ndikim të madh në shëndetin e zemrës.
Doktoresha Mary Branch, kardiologe në Cone Health në Greensboro, Karolina e Veriut, ka thënë për Eating Well se disa zakone të thjeshta para gjumit mund të ndihmojnë në uljen e tensionit.
“Nuk keni nevojë të bëni ndonjë ushtrim të lodhshëm para gjumit, këto janë hapa të lehtë që mund t’i përfshini në rutinën tuaj”, ka thënë ajo.
Pesë zakone të thjeshta që, sipas doktoreshës, mund t’ju ndihmojnë:
1. Kufizimi i konsumimit të alkoolit
Në fund të ditës, ndoshta shumëkush relaksohet me një gotë verë apo ndonjë pije alkoolike. Por nëse keni tension të lartë, është me rëndësi që të kufizoni konsumimin e alkoolit.
“Për gratë rekomandohet jo më shumë se një pije në ditë, dhe për burrat jo më shumë se dy”, ka shpjeguar Branch.
Edhe sasi të vogla të alkoolit mund ta vështirësojnë kontrollin e tensionit dhe të ndikojnë në efektin e ilaçeve. Një studim madje ka treguar se çdo pije shtesë në ditë lidhej me rritje të tensionit.
Zëvendësojeni pijen e mbrëmjes me çaj bimor si kamomili, ose thjesht me ujë.
“Zgjedhjet pa kafeinë janë më të mira, sepse nuk e prishin gjumin”, ka shtuar Branch.
2. Mos harroni ilaçet
“Nëse jeni të diagnostikuar me hipertension dhe merrni ilaçe, është e rëndësishme që t’i merrni çdo ditë, edhe në darkë”, ka thënë Branch.
Edhe nëse ndiheni shumë të lodhur për ta hapur shishen e ilaçit, mos e lini për nesër.
Qëndrueshmëria në marrjen e ilaçeve është thelbësore për të shmangur silmin në zemër apo tru. Vendosni alarme në telefon ose përdorni organizator për ilaçet. Mbajini pranë shtratit për t’ju lehtësuar rutinën.
3. Praktikoni meditimin ose qetësimin e mendjes
“Sjellja e qetësisë mendore përpara gjumit mund të ndihmojë në uljen e stresit e të tensionit”, ka theksuar Branch.
Po ashtu, ndihmon që të bëni gjumë më të thellë, tjetër faktor që ndikon në uljen e tensionit.
Teknikat si meditimi, joga e lehtë, shtrirjet relaksuese apo edhe mbajtja e një ditari për të shkarkuar mendimet para gjumit janë mënyra të mira për të arritur qetësi. Një ambient i qetë dhe i errët po ashtu ndihmon trupin të kuptojë se është koha për të pushuar.
4. Shmangni ushqimet me shumë kripë
Nëse keni uri para gjumit, shmangni ushqimet e kripura si patatinat, supat e gatshme apo biskotat me kripë.
“Kripa bën që trupi të mbajë ujë, gjë që rrit tensionin në enët e gjakut”, ka sqaruar Branch.
Zgjidhni ushqime të lehta si fruta të freskëta, arra pa kripë ose kokoshka të përgatitura në shtëpi pa gjalpë dhe kripë. Janë të shijshme dhe më të mira për zemrën.
5. Mbajeni dhomën e gjumit të freskët, të errët dhe të qetë
Gjumi i mirë ndikon drejtpërdrejt në tensionin e gjakut. Nëse flini pak ose keni gjumë jo të rehatshëm, me kalimin e kohës mund të pësoni rritje të tensionit.
“Dhoma e freskët, e errët dhe e qetë ndihmon trupin të pushojë dhe të rikuperohet më mirë”, ka thënë Branch.
Investoni në një dyshek dhe jastëk të rehatshëm, fikni dritat dhe eliminoni zhurmat para gjumit, këto gjëra ndihmojnë trupin të relaksohet dhe tensioni të stabilizohet.
Këshilla kryesore nga ekspertja:
“Gjërat e vogla që bëni para gjumit mund të kenë ndikim të madh në shëndetin tuaj të zemrës. Mos e nënvlerësoni fuqinë e zakoneve të përditshme. Tensioni i qëndrueshëm është rezultat i përkujdesjes së vazhdueshme”, ka përfunduar Branch.