Në një moment jemi duke fjetur në qetësi, ndërsa papritmas e gjeni veten të zgjuar në mes të natës pa ndonjë arsye.
Ju duket gjë e njohur kjo?
Zgjimi gjatë natës nuk është diçka e pazakontë.
Një studim në SHBA i kryer nga “Sleep Medicine” ka zbuluar se një e treta e të rriturve zgjohen gjatë natës së paku tri herë në javë, shkruan “The Sun”.
Dhe gati 40 për qind e atij grupi e kanë të vështirë të vazhdojnë gjumin më pas.
Po ashtu ideja se duheni të zgjoheni pas pak orëve e bën situatën edhe më të vështirë.
Por, pse zgjoheni në mes të natës, dhe si të riktheheni sërish në gjumë?
Ekspertët thonë se kur ne flejmë, kalojmë në disa cikle prej 90-minutave.
Këto cikle përfshijnë faza të ndryshme të gjumit. Në fazën më të vonshme, futesh në gjumë më të lehtë.
Në atë moment ka shumë më tepër gjasa të zgjohesh edhe në zhurmat më të vogla, si ato të veturave, apo nëse lëviz partneri i juaj në shtrat, thotë eksperti i gjmit Neil Stanley, ish-kryetar i Shoqërisë Britanike të Gjumit (BSS).
Në mëngjes, ka shumë pak gjasa të mbani në mend gjitha ato raste kur jeni zgjuar gjatë natës.
Por, për disa të pafat, nuk është e lehtë të rikthehen në gjumë.
Greg Murray, profesor dhe drejtor i Qendrës për Shëndetin Mental në Universitetin e Swinburnet, shpjegon se kjo ndodh zakonisht mes orës 3 dhe 4 të mëngjesit.
Derisa trupi përgatitet për mëngjes, temperatura bazë e trupit dhe hormonet që ju zgjojnë nisin të rriten, ndërsa dëshira për të fjetur zvogëlohet.
“Shtoni aty pak stres, atëherë ka gjasa shumë të mira që të zgjoheni plotësisht”, thotë Murray.
Ekspertët e gjumit japin disa udhëzime se si të ktheheni sërish në gjumë.
Evitoni shkuarjen në tualet
Mund të besoni se një shkuarje e shpejt në tualet për të liruar fshikëzën mund t’ju ndihmojë të vazhdoni gjumin.
Por, psikologu Michael Breus, tha për “Business Insider” se duhet të qëndroni në shtrat.
Kjo pasi nëse largoheni nga ngrohtësia e shtratit, zemra duhet të pompojë më tepër gjak nëpër trup.
Duhet një shkallë më e ulët e të rrahurave të zemrës për të fjetur. Për këtë arsye, shkuarja në tualet bën efekt të kundërt.
Mos e shikoni orën
Nganjëherë mund të ju duket e nevojshme të shikoni orën në celularin e juaj, kur nuk jeni në gjendje të flini.
Psikologu Michael Breus thotë se duhet të evitoni të shikoni celularin, pasi kur shikoni orën mund të ju rritet stresi dhe të ju mbajë më tepër zgjuar.
Ekspertët thonë se nëse nuk keni fjetur brenda 15 minutave pasi zgjoheni, atëherë ngrihuni nga shtrati.
“Nuk është nevoja të shikoni orën; vetëm llogarisni 15 minuta”, thotë Michael.
Doktoresha Bryony Sheaves dhe profesori Colin Espie nga Unviersiteti i Oxfordit, thonë se mund të ktheheni në shtrat pasi ndiheni të përgjumur.
Hiqni dorë nga alkooli
Disa njerëz vendosin të pinë alkool pak para se të flejnë.
Por, alkooli mund të shkatërrojë kualitetin e gjumit tuaj, që ju shkakton edhe shqetësime gjatë natës.
Kjo pasi alkooli bllokon tritopanin – një amino acid që ju ndihmon të flini – që të shkojë deri te truri.
Profesori Malcom von Schantz, nga Universiteti i Surreyt, thotë: “Alkooli ka efekt të çuditshëm që ju bën të flini më lehtë, por e bën më të vështirë të qëndroni në gjumë dhe pengon kualitetin e gjumit tuaj”.
Mos i lini afër shtratit kafshët shtëpiake
Sado që mund të jetë e mirë të keni një kafshë shtëpiake afër për ta përqafuar, ekspertët thonë se nuk duhet të keni kafshë në shtratin e juaj.
Mund të ndikojnë që t’ju humbin gjumin. Për më tepër, gjumi me një kafshë shtëpiake mund të përkeqësojë edhe alergjitë apo astmën tek ata që janë të ndjeshëm ndaj saj.
Ulni temperaturën e dhomës
Mund të ju duket se të keni një shtëpi të nxehtë në muajt e ftohtë, mund të ju duket e mirë, por kjo ju pengon gjumin.
Kjo ndodh sepse sistemet e ngrohjes qendrore thajnë mukozën, duke ju bërë më të etur gjatë natës.
Doktori Neil thotë se temperatura optimale për një natë të mirë është 18 gradë Celsius apo më e ulët.
Duhet të humbim rreth 1 gradë Celsius të temperaturës sonë të brendshme të trupit, e cila qëndron në rreth 37 gradë Celsius.
Nëse jeni në një dhomë shumë të ngrohtë, trupi i juaj nuk mund ta hedhë poshtë nxehtësinë e tepërt dhe kjo do të thotë se gjumi i juaj do të pengohet.
Fikni ngrohjen në dhomën tuaj të gjumit dhe në vend të kësaj përdorni jorganë, batanije dhe krijoni hapësirë në krevat për të marrë frymë, për të ndihmuar të rregulloni temperaturën e trupit tuaj.
Çlironi mendjen
Për të ndihmuar në gjumin tuaj, duhet të çlironi edhe mendjen, thotë Fondacioni Kombëtar i Gjumit.
“Të mësosh të qetësosh mendjen mund të jetë një aftësi e dobishme, si për të kaluar një periudhë stresuese gjatë ditës, ashtu edhe për të fjetur gjatë natës. Mund të hulumtoni aplikacione për të bërë këtë”, thotë Fondacioni.
Gjithashtu rekomandohet të bëni më tepër stërvitje pasi ushtrimi i rregullt ju bën të prireni të flini më shpejt e të flini më mirë.
