Astronomët zbulojnë yllin më të shpejtë në Rrugën e Qumështit

Astronomët kanë zbuluar yllin më të shpejtë të njohur deri më tani në Rrugën e Qumështit, i cili lëviz me shpejtësi marramendëse rreth vrimës së zezë supermasive në qendër të galaktikës.

Ylli, i quajtur S301, lëviz me rreth 25,000 km në sekondë, pra rreth 100,000 herë më shpejt se një avion komercial. Ai është gjithashtu ylli i njohur më i afërt me vrimën e zezë qendrore të Rrugës së Qumështit, Sagittarius A*, duke iu afruar asaj deri në një distancë të krahasueshme me distancën nga Saturni te Dielli.

Afërsia ekstreme e S301 me Sagittarius A* mund të hapë një dritare të re për studimin e vetive themelore të vrimës së zezë dhe të mjedisit ekstrem që e rrethon atë, shkroi Guardian. 

Më parë, mendohej se do të nevojitej matja e lëvizjes së disa yjeve për disa dekada për të përcaktuar rrotullimin e Sagittarius A*. Megjithatë, shkencëtarët kanë arritur ta gjurmojnë orbitën e S301 që nga viti 2017 dhe, duke e ndjekur atë deri në afrimin e ardhshëm me vrimën e zezë në vitin 2031, shpresojnë të kenë të dhëna të mjaftueshme.

“Ky është një zbulim jashtëzakonisht i rëndësishëm. Është shumë emocionues, sepse ky objekt afrohet në mënyrë të pabesueshme me Sagittarius A* dhe, në pikën e tij të shpejtësisë maksimale, lëviz me rreth 8% të shpejtësisë së dritës”, tha astrofizikani Ziri Younsi.

Edhe Kuriozitet 12 pri 2026 A e dini se ka më shumë yje në hapësirë sesa kokrra rëre në të gjithë botën

Younsi tha se përdorimi i orbitës së S301 për të matur rrotullimin e vrimës së zezë do të ishte një zbulim që do të ndryshonte shumë mënyrën se si e kuptojmë evolucionin dhe zhvillimin e Rrugës së Qumështit.