Serbia shkel Marrëveshjen, ia refuzon Sveçlës vizitën në Luginë

Serbia ka refuzuar kërkesën e ministrit të Brendshëm, Xhelal Sveçla, për vizitë në Preshevë, Bujanoc e Medvegjë. Veprimi i Beogradit zyrtar është kualifikuar shkelje e Marrëveshjes së Brukselit për vizitat zyrtare. E, politikanë shqiptarë në Luginë e Serbi kërkuan që komuniteti ndërkombëtar të reagojë karshi veprimeve të Serbisë, që i kualifikuan si pengesë për normalizimin e marrëdhënieve

Gjashtë ditë pasi ministrit të Kulturës, Hajrullah Çeku, iu refuzua kërkesa për vizitë zyrtare në Preshevë, Serbia e ka ndaluar qëndrimin në Luginë edhe të ministrit të Brendshëm, Xhelal Sveçla.

Vizita e tij pati për synim takimin me përfaqësues të Këshillit Kombëtar të Shqiptarëve.

Por, sipas Ministrisë së Jashtme, Qeveria në Beograd e refuzoi atë shkaku i qëndrimeve të ministrit Sveçla.

“Përkundër faktit që janë ndjekur të gjitha procedurat e parapara për vizita të tilla zyrtare të përfaqësuesve qeveritarë dhe shtetërorë të Republikës së Kosovës në Serbi, sipas Marrëveshjes së Brukselit për Vizita Zyrtare, Qeveria e Serbisë e ka refuzuar kërkesën për lejimin e kësaj vizite. Si pretekst për refuzim janë theksuar qëndrimet dhe veprimet e ministrit Sveçla, të cilat, sipas Qeverisë së Serbisë, janë të drejtuara kundër komunitetit serb në Republikën e Kosovës, si dhe kundër normalizimit, paqes dhe stabilitetit”, thuhet në reagim.

Në Ministri thanë se veprimet e tilla të Serbisë kanë për qëllim që t’i mbajnë në shkallë të lartë tensionet me Kosovën.

Edhe Arbëri 25 dhj 2024 Sveçlës i refuzohet vizita në Luginë: Serbia vazhdon me provokime

“Veprime të tilla të Qeverisë së Serbisë kanë për qëllim të qartë mbajtjen e tensioneve me Republikën e Kosovës në shkallë të lartë. Janë pjesë e provokimeve të vazhdueshme, të cilat Serbia i bën në baza të rregullta dhe me qëllim të shkaktimit të konflikteve, ku aktet terroriste në Banjskë dhe në Ibër-Lepenc janë manifestimi më i dukshëm i këtyre synimeve nga ana e Serbisë”, thuhet në reagim.

Deputeti i vetëm shqiptar në Parlamentin e Serbisë, Shaip Kamberi, e kualifikoi refuzimin e vizitës si shkelje të marrëveshjeve ndërkombëtare.

“Refuzimi i vizitës së paralajmëruar të ministrit të Punëve të Brendshme të Republikës së Kosovës, z. Xhelal Sveçla, dhe më herët i ministrit Hajrullah Çeku, nga Qeveria e Serbisë, është një tjetër provokim i hapur dhe një shkelje e qartë e marrëveshjeve ndërkombëtare. Kjo qasje dëshmon përpjekjet e vazhdueshme të Serbisë për të bllokuar çdo formë të mbështetjes institucionale për shqiptarët e Luginës së Preshevës dhe për të penguar dialogun dhe normalizimin. Veprime të tilla janë pjesë e një politike sistematike të diskriminimit dhe izolimit, që synojnë ta dobësojnë edhe më tej pozitën e shqiptarëve në këto komuna”, ka theksuar Kamberi.

Qëndrim të njëjtë ka shprehur edhe Ragmi Mustafi, politikan nga Lugina e Preshevës dhe njëherësh këshilltar i zëvendëskryeministrit Besnik Bislimi.

“Ky veprim jo vetëm që pengon përpjekjet për normalizim dhe ndërtim të paqes, por është gjithashtu një përpjekje për të izoluar shqiptarët e Luginës nga mbështetja institucionale e Kosovës. Serbia vazhdon politikën e saj të diskriminimit sistematik, duke përdorur çdo mjet për të bllokuar angazhimet zyrtare të përfaqësuesve të institucioneve të Kosovës në Luginën e Preshevës. Këto veprime janë një vazhdimësi e politikës së vjetër të tensioneve dhe provokimeve që përkeqësojnë jetën e shqiptarëve në Luginën e Preshevës. Është e domosdoshme që komuniteti ndërkombëtar të reagojë ndaj këtyre akteve diskriminuese dhe penguese. Shqiptarët e Luginës së Preshevës meritojnë trajtim të barabartë dhe respektim të të drejtave të tyre themelore”, ka deklaruar Mustafi.

Serbia edhe në janar e pati refuzuar kërkesën e ministrit Sveçla për vizitë në Preshevë, Medvegjë e Bujanoc.

Shqetësimin për refuzimin e vizitave të zyrtarëve të Kosovës në Luginë, kryenegociatori i Kosovës në dialog, Besnik Bislimi, ka thënë se e ka shprehur në takimin e 17 dhjetorit në Bruksel me homologun nga Serbia, Petar Petkoviq, dhe me përfaqësuesin e posaçëm të BE-së, Miroslav Lajçak.  

Edhe Arbëri 4 jan 2024 Kosova paralajmëron reciprocitet me Serbinë në leje për vizita zyrtare

Në kuadër të dialogut teknik, Kosova dhe Serbia arritën marrëveshjen për vizita zyrtare, dhe ajo ka hyrë në fuqi më 1 dhjetor të 2014-s.