Murati e Bajrami përplasen në distancë për bashkëpunim me Listën Serbe

Akuza për bashkëpunim me Listën Serbe dhe për përfshirje në monopole energjetike janë shkëmbyer ndërmjet zyrtarëve të Lëvizjes Vetëvendosje dhe të Lidhjes Demokratike. Ministri në detyrë i Financave, Hekuran Murati, dhe deputetja Hykmete Bajrami përplasjen në distancë e kanë bërë në rrjete sociale

Ministri në detyrë i Financave, Hekuran Murati dhe deputetja e Lidhjes Demokratike (LDK), Hykmete Bajrami, janë përplasur të enjten në distancë, nëpërmjet akuzave rreth bashkëpunimit me Listën Serbe, parti politike që i përfaqëson serbët në Kosovë dhe që mbështetet nga Beogradi zyrtar.

Fillimisht, Murati ka shkruar në “Facebook” se Lëvizja Vetëvendosje (LVV) e ka dhënë propozimin që nënkryetari i Kuvendit, i cili i takon komunitetit serb, të mos jetë nga Lista Serbe (LS), porse ka theksuar që partitë e tjera nuk janë përgjigjur, për shkak se llogarisin në mbështetjen e këtij subjekti politik, që mban lidhje të forta me pushtetin në Serbi.

“Besoj që qëndrimi për temën e nënkryetarit e tregon më së miri se cilat parti ende presin dhe shpresojnë për bashkëpunim me Listën Serbe, e ato janë PDK-ja, LDK-ja, AAK-ja”, ka shkruar Murati.

Bajrami i është kundërpërgjigjur Muratit, duke ia rikujtuar ftesën për koalicion që Vetëvendosja ia ka drejtuar LDK-së, e edhe bisedat e ish-shefes së Grupit Parlamentar të Vetëvendosjes, Mimoza Kusari-Lila, me Milan Radoiçiqin, që tash është i akuzuar për terrorizëm, por që ka qenë nënkryetar i Listës Serbe.

Ajo ka hedhur edhe një akuzë të re, në formë pyetjeje.

“Tashmë të gjithë e kanë të qartë se sa herë që i vjen erë korrupsion krejt Lëvizjes Vetëvendosje, ata provojnë me luajtë ‘patriotin’, kinse të tjerët janë me Serbinë. Tregona, Hekuran, si ndodhi që në qeverinë tuaj EFT-ja e Vuk Hamoviqit i monopolizoi linjat e transmetimit të energjisë: Mal i Zi-Kosovë, Maqedoni e Veriut-Kosovë, dhe anasjelltas?”, ka shkruar ajo.

Polemika ka vazhduar edhe me statuse të tjera në “Facebook”. Murati ka shkruar se Vetëvendosja i ka dërguar ftesë për koalicion LDK-së, por pa përfshirjen e Partisë Demokratike (PDK) dhe të Listës Serbe.

E, sipas tij, partia së cilës i përket Bajrami ka insistuar që në koalicion të përfshihen edhe këto dy subjekte politike.

Bajrami i është kundërpërgjigjur këtij pretendimi me akuza.

Ajo ka shkruar se Vetëvendosja, PDK-në dhe Listën Serbe i përdor për ta zhvendosur vëmendjen prej “mafisë energjetike”.