Me urdhër të Speciales arrestohen Smakaj, Kilaj e Fazliu, bastiset shtëpia e Kuçit

Zyra e Prokurorit të Specializuar ka arrestuar ish-kryetarin e Malishevës, Isni Kilaj, ish-këshilltarin e ish-presidentit Thaçi për Siguri, Bashkim Smakajn, si dhe ish-luftëtarin e UÇK-së, Fadil Fazliu. E në shtëpinë e ish-zëvendëskryeministrit Hajredin Kuçi ka kryer bastisje. ZPS-ja ka thënë se aksioni i sotëm ka të bëjë me veprat penale të pengimit të administrimit të drejtësisë. Aksioni është kundërshtuar nga OVL-UÇK-së dhe Partia Demokratike.

Me urdhër të Zyrës së Prokurorit të Specializuar të enjten është ndërmarrë aksion i gjerë në Kosovë, ku janë kryer arrestime e bastisje në disa shtëpi të ish-pjesëtarëve të UÇK-së. 

Gjatë aksionit janë arrestuar: ish-kryetari i Malishevës, Isni Kilaj, ish-shefi i AKI-së Bashkim Smakaj dhe ish-pjesëtari i UÇK-së, Fadil Faziu.

Kjo prokurori me seli në Hagë ka njoftuar se aksioni ka të bëjë me dyshimet për vepra penale kundër administrimit të drejtësisë. 

"Zyra e Prokurorit të Specializuar (ZPS) po kryen operacione në vazhdimësi në Kosovë në një proces hetimor që përqendrohet në vepra penale kundër administrimit të drejtësisë. Operacionet e ZPS-së janë autorizuar nga ana gjyqësore prej Dhomave të Specializuara të Kosovës (DHSK) dhe janë mbështetur nga Misioni i Bashkimit Evropian për Sundimin e Ligjit në Kosovë (EULEX)", thuhet në njoftimin e Speciales, i lëshuar gjatë ditës së enjte.

Fahri Fazliu, djali i Fadil Fazliut, ka thënë se babai i tij do të dërgohet në paraburgim në Hagë. 

Edhe Arbëri 6 dhj 2024 Kilaj, Smakaj e Fazliu dërgohen në Hagë

“Ai ndodhet për momentin në zyrat e EULEX-it në Fushë-Kosovë dhe pritet të dërgohet për në Hagë”, ka theksuar Fazliu. 

E avokati i Fazliut, Skender Musa, u shpreh se sa ishte në EULEX zyrtarët e ZPS-së i thanë se nuk e kanë paraparë intervistimin e Fazliut, por dërgimin në Hagë.

“Informata të tjera nuk kemi arritur të sigurojmë”, ka thënë ai.

Lidhur me arrestimin e tij, pastaj të ish-këshilltarit të ish-presidentit, Hashim Thaçi, për siguri, Bashkim Smakaj, dhe të ish-kryetarit të Komunës së Malishevës, ka njoftuar edhe udhëheqësi i Organizatës së Veteranëve të UÇK-së, Faton Klinaku.

Ai ka thënë se arrestimet e bëra nga ZPS-ja janë sa për të bërë spektakël. 

“Gjykata Speciale po vazhdon gjahun ndaj UÇK-së dhe luftëtarëve të lirisë. Në media u dha lajmi për arrestimin e Isni Kilajt e Bashkim Smakajt, por, sipas informatave që po më vijnë, është arrestuar edhe Fadil Fazliu, vëllai i dëshmorëve Fahri e Bahri Fazliu”, ka thënë Klinaku.

Isni Kilaj ka pasur aktakuzë të ngrirë, mirëpo ajo është ndryshuar dhe ai llogaritet si i dyshuar. 

Edhe Arbëri 6 dhj 2024 Kilaj, Smakaj e Fazliu janë duke u mbajtur ende në zyrat e EULEX-it në Fushë-Kosovë

Te shtëpitë e Smakajt dhe Fazliut, ZPS-ja pati kryer bastisje edhe vitin e kaluar. 

E që nga orët e hershme të mëngjesit të së enjtes e deri në mbrëmje, hetuesit e ZPS-së kanë qëndruar edhe në shtëpinë e Hajredin Kuçit në Prishtinë, duke kërkuar prova që mund t’i ndihmojnë në hetimet e tyre lidhur me frikësimin e dëshmitarëve apo shpalosjen e informacioneve të dëshmitarëve të mbrojtur. 

Reagim kanë lëshuar edhe ish-këshilltarët e ish-presidentit Hashim Thaçi, të cilët e ndërlidhën bastisjen me hakmarrje të sistemit të Dhomave të Specializuara, meqë një ditë më parë Thaçi në Gjykatën Speciale paraqiti vërejtje në pyetjen e një gjyqtari. 

Edhe PDK-ja ka shprehur shqetësim lidhur me zhvillimet që ndërlidhen me Gjykatën Speciale.

“Partia Demokratike e Kosovës (PDK) po i ndjek me shqetësim zhvillimet e fundit që lidhen me veprimet e Dhomave të Specializuara të Kosovës.

PDK-ja thekson rëndësinë e ruajtjes së standardeve më të larta të drejtësisë dhe të paanshmërisë, që janë gur themel i funksionimit të çdo institucioni gjyqësor, përfshirë Dhomat e Specializuara. Besojmë fuqimisht se drejtësia dhe paanshmëria nuk janë vetëm kërkesa, por kushte të domosdoshme për një proces të drejtë dhe të besueshëm”, thuhet në reagimin e PDK-së.

Edhe Arbëri 5 dhj 2024 Specialja arreston Isni Kilajn, Bashkim Smakajn dhe Fadil Fazliun

Në komunikatën për media kjo parti, që dikur është udhëhequr nga Hashim Thaçi e më pas edhe nga Kadri Veseli, të dy të akuzuar nga Specialja, ka shkruar po ashtu se kërkesa e fundit që e ka paraqitur mbrojtja e katër të akuzuarve në rastin ku po gjykohen ish-udhëheqësit e Shtabit të Përgjithshëm të UÇK-së “ka ngritur shqetësime serioze për trajtimin jo të drejtë” në këtë proces. 

Mbrojtja e të akuzuarve ditë më parë është ankuar për anshmëri të trupit gjykues.