Gjykata Speciale të enjten ka arrestuar ish-komandantin e Ushtrisë Çlirimtare të Kosovës, Isni Kilaj, ish-shefin e Agjencisë Kosovare për Inteligjencë, Bashkim Smakaj dhe vëllain e Fahri dhe Bahri Fazliut, Fadilin.
Specialja në një njoftim dërguar mediave ka thënë se Zyra e Prokurorit të Specializuar "po kryen operacione në vazhdimësi në Kosovë në një proces hetimor që përqendrohet në vepra penale kundër administrimit të drejtësisë".
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo"Zyra e Prokurorit të Specializuar (ZPS) po kryen operacione në vazhdimësi në Kosovë në një proces hetimor që përqendrohet në vepra penale kundër administrimit të drejtësisë. Operacionet e ZPS-së janë autorizuar nga ana gjyqësore prej Dhomave të Specializuara të Kosovës (DHSK) dhe janë mbështetur nga Misioni i Bashkimit Evropian për Sundimin e Ligjit në Kosovë (EULEX)", thuhet në njoftimin e Speciales.
Familjarët e të arrestuarve kanë konfirmuar aksionin e Speciales gjatë ditës së sotme.
Në një prononcim për media djali i Fadil Fazliut, Fahriu ka thënë se ai pritet të dërgohet në Hagë.
“Ai ndodhet për momentin në zyrat e EULEX-it në Fushë-Kosovë dhe pritet të dërgohet për në Hagë”, ka theksuar Fazliu.
Ai ka thënë se nuk kanë informata se për çfarë është arrestuar.
Ndërkohë Kilaj, i cili kishte shërbyer edhe si kryetar i Malishevës, qe arrestuar edhe në nëntor të vitit të kaluar nën dyshimin për pengim të drejtësisë. Në maj të këtij viti, ai u lirua nën kushte të rrepta, por vazhdoi të ngelte si i dyshuar. Si kusht paraprak për lirim e pati shumën prej 30 mijë eurosh të cilën duhej t’ia jepte administratores si garanci financiare.
Vitin e kaluar, Specialja pati bastisur shtëpitë e ish-këshilltarit të Hashim Thaçit, Bashkim Smakaj si dhe të Fadil Fazliut.
Artan Qerkini, avokat i Smakajt, pas bastisjeve kishte thënë se dyshimi i prokurorisë së specializuar është te veprat penale kundër administrimit të drejtësisë.
Faton Klinaku, ushtruesi i detyrës së kryetarit të Organizatës së Veteranëve të Luftës së Ushtrisë Çlirimtare të Kosovës (OVL-UÇK), ka thënë se Specialja po vazhdon gjahun ndaj luftëtarëve të lirisë.
“Gjykata Speciale po vazhdon gjahun ndaj UÇK-së dhe luftëtarëve të lirisë. Në media u dha lajmi për arrestimin e Isni Kilajt e Bashkim Smakajt, por sipas informatave që po më vijnë është arrestuar edhe Fadil Fazliu, vëllai i dëshmorëve Fahri e Bahri Fazliu”, ka shkruar Klinaku në Facebook.
Bastiset shtëpia e Hajredin Kuçit
FOTO: KOHA
Në aksionin e sotëm të Zyrës së Prokurorit të Specializuar është bastisur edhe shtëpia e ish-ministrit të Drejtësisë, Hajredin Kuçi.
KOHA ka siguruar foto ndërsa forcat policore po qëndrojnë në rrugën që të çon te shtëpia e Kuçit.
Njësitet policore bashkë me EULEX-in janë para shtëpisë së ish-ministrit që nga ora 6 e mëngjesit.
Në mars ishte raportuar për bastisje të shtëpisë së Kuçit, të cilën e pati mohuar më vonë vetë ai.
Specialja gjatë ditës së sotme ka arrestuar ish-komandantin e Ushtrisë Çlirimtare të Kosovës, Isni Kilaj, ish-shefin e Agjencisë Kosovare për Inteligjencë, Bashkim Smakaj dhe vëllain e Fahri dhe Bahri Fazliut, Fadilin.
Në një njoftim për media, Specialja ka thënë se këto veprime po ndërmerren për dyshimet se është kryer vepra penale “pengimi i drejtësisë”.