IKD-ja dhe GLPS-ja akuzojnë u.d. të kryeprokurorit Agon Qalaj se po e pengon reformën në KPK

Organizata të shoqërisë civile kanë reaguar ndaj vendimit të kryeprokurorit Agon Qalaj për të mos e konsideruar të miratuar rendin e ditës që u votua nga tre prej pesë anëtarëve të pranishëm. Ato e kanë fajësuar atë për pengim të reformës në drejtësi

Shoqëria Civile ka reaguar ndaj mënyrës se si ushtruesi i detyrës së kryeprokurorit të Shtetit, Agon Qalaj ka udhëhequr mbledhjen e së martës, të parën pas ndryshimeve ligjore, në të cilën ai konstatoi se tre prej pesë anëtarëve nuk e bëjnë shumicën.

Qalaj, i cili tha se duhet të jenë katër anëtarë, meqë Këshilli numëron shtatë, është fajësuar për pengim të reformës në drejtësi. 

Nga Instituti i Kosovës për Drejtësi (IKD) kanë theksuar se propozimi për rend dite ku përfshihej si pikë e parë e rendit të ditës certifikimi i Elza Bajrami-Kastratit ka marrë shumicë votash. 
Sipas kësaj organizate, kuorumi për vendimmarrje është pesë anëtarë në bazë të ligjit të ri, ndërsa tre paraqesin shumicën e thjeshtë të paraparë me ligj. 

“Sipas kësaj dispozite, situata është plotësisht e qartë: KPK ka kuorum të mjaftueshëm prej pesë (5) anëtarësh për mbajtjen e takimit. Ndërkaq, vendimmarrja merret me shumicën e thjeshtë të votave të të gjithë anëtarëve të Këshillit. Ligji nuk i referohet tërësisë së numrit të anëtarëve, por i referohet ‘anëtarëve të Këshillit’, të cilët aktualisht janë pesë (5), dhe shumica e thjeshtë e tyre është tre (3). IKD vlerëson se ndërhyrje të tilla në procedurën e vendimmarrjes përbëjnë tentativë për të sabotuar reformën në KPK përmes shkeljeve të hapura ligjore. Instituti i Kosovës për Drejtësi konsideron se përgjegjësia për këtë situatë i takon drejtpërdrejt ushtruesit të detyrës së kryeprokurorit të Shtetit, i cili, në vend se të sigurojë zbatimin e ligjit dhe funksionimin ligjor të KPK-së, ka zgjedhur të bllokojë një proces të rregullt dhe të ligjshëm vendimmarrës”, thuhet në reagimin e IKD-së.

Qalaj në mbledhjen e kaluar shpërfilli propozimin e tre anëtarëve për ta futur si pikë të parë certifikimin e Bajrami-Kastratit që u zgjodh anëtare e KPK-së vitin e kaluar. 

E pasi ky propozim për rend dite u votua me shumicë votash, ai konsideroi se nuk ka kaluar. 

Edhe Arbëri 21 jan 2026 IKD: Qalaj po e bllokon zbatimin e reformës në KPK

Për këtë ka reaguar edhe Grupi për Studime Juridike dhe Politike (GLPS), tek ka bërë thirrje që të gjithë anëtarët t’i përmbushin obligimet e tyre ligjore. 

“Në fund, GLPS mbetet me shpresë që Këshilli në një kohë sa më të shkurtër do të ketë përbërje të plotë prej 7 anëtarëve, kurse deri atëherë iu bën thirrje të gjithë anëtarëve aktualë të Këshillit që të kontribuojnë në mbarëvajtjen e veprimtarisë së këtij institucioni dhe të ushtrojnë mandatin e tyre konform obligimeve ligjore”, thuhet në reagimin e GLPS-së.

GLSP-ja në reagim ka shkruar se çdo tentativë për të mos zbatuar ligjet në fuqi, nuk mund të interpretohet ndryshe, veçse tendencë për pengim të reformës.