Hashim Thaçi: Unë nuk paraqes rrezik politik për askënd

Në paraqitjen e tij të parë për rastin më të ri të Speciales lidhur me vepra penale kundër administrimit të drejtësisë, ish-presidenti Hashim Thaçi i kërkoi Gjykatës Speciale që t’i respektohen të drejtat. Zyra e Prokurorit të Specializuar pretendon se Thaçi i udhëhoqi tri grupe me qëllim që të ndikonin te dëshmitarët për të dhënë dëshmi shfajësuese në gjykimin tjetër për krime lufte dhe krime kundër njerëzimit

Një deklarim të gjatë e ka bërë të dielën ish-presidenti Hashim Thaçi në rastin më të ri të Speciales, ku Zyra e Prokurorit të Specializuar pretendon se tentoi të ndikojë te të tjerët përmes vizitorëve të tij në Qendrën e Paraburgimit të Dhomave të Specializuara.

Pasi u pyet se a do të deklarohet që në seancën e parë mbi akuzat e reja të ZPS-së, ai kërkoi që Gjykata Speciale t’ia respektojë të drejtat. Thaçi u shpreh i befasuar me aktakuzën.

“Krejt papritmas para dy-tre ditësh u njoftova për aktakuzën e re nga Zyra e Prokurorit të Specializuar. E di se Kosova është në prag të zgjedhjeve të përgjithshme elektorale, por nuk jam pjesë e garës elektorale”, ka thënë Thaçi.

Ai në fjalimin e tij, ka thënë se nuk i shkel ligjet.

E mbi fajësinë, ish-presidenti dhe ish-kryeministri i Kosovës nuk deshi të deklarohet në seancën e së dielës.

Edhe LAJMET E MBRËMJES 17 dhj 2024 Thaçi aludon se akuzat e Speciales ndaj tij janë të motivuara politikisht

“Unë nuk paraqes rrezik politik për askënd. Unë besoj dhe i respektoj Kushtetutën dhe ligjet e Kosovës. Kërkoj edhe sot nga të gjithë, kudo që jeni ulur në cilëndo anë, në cilëndo uniformë që jeni në këtë sallë, të respektohen Kushtetuta dhe ligjet e Kosovës, sepse Dhomat e Specializuara janë produkt i institucioneve të Republikës së Kosovës. Unë nuk e kam pasur mundësinë që ta diskutoj në thelb dokumentin e konfirmuar, andaj do të deklarohem në kohë brenda afatit të rregullt kushtetues dhe ligjor, ka thënë Thaçi.

Shqetësimet që i ngriti janë në një vijë me kërkesën e përbashkët të mbrojtjes, e cila dy javë para se të ngrihej kjo aktakuzë, kërkoi që Gjykata t’i shmangë veprimet që e krijojnë përshtypjen se po ia mban anën Prokuroria me pyetje sugjeruese.

Në rastin e ri, Thaçi dyshohet se shpalosi informacion lidhur me dëshmitarët e mbrojtur, se nuk iu bind urdhrave gjyqësorë që ndalojnë shpalosjen e këtyre informatave, si dhe ka tentuar t’i pengojë Prokurorinë dhe Gjykatën në punën e tyre.

“Hashim Thaçi ishte udhëheqësi dhe organizatori i grupit. Ai shpalosi informacion konfidencial që i ishte paraqitur gjatë gjykimit, me çka bëri (përpjekje për) pengim të personave zyrtarë në kryerjen e detyrave zyrtare. Ai iu dha udhëzime Fadil Fazliut, Bashkim Smakajt, Isni Kilajt dhe të tjerëve që të ndikojnë në mënyrë të kundërligjshme mbi dëshmitarët e ZPS-së”, thuhet në aktakuzën e re.

Në aktakuzën e re, në tri pika përmendet ish-presidenti për pengim të personave zyrtarë në kryerjen e detyrave zyrtare, në katër të tjera për shkeljen e fshehtësisë së procedurës dhe në tri pika të tjera për mosbindje ndaj urdhrave të Gjykatës.

Pos Thaçit, Hajredin Kuçit, Bashkim Smakajt, Isni Kilajt e Fadil Fazliut si të akuzuar, në aktakuzë përmenden edhe ish-këshilltarët e Thaçit, si Artan Behrami dhe Blerim Shala.

Ndërkohë, në seancën e së dielës për këtë rast, ish-pjesëtari i Ushtrisë Çlirimtare të Kosovës, Fadil Fazliu, u deklarua i pafajshëm lidhur me akuzat për mosbindje ndaj Gjykatës dhe për përpjekje për ta penguar punën e Prokurorisë dhe të Gjykatës Speciale në Hagë.

E pos Thaçit, edhe ish-shefi i Agjencisë së Kosovës për Inteligjencë, Bashkim Smakaj, nuk u deklarua mbi fajësinë.

Fadil Fazliu u shpreh se e ndien veten përgjegjës në akuzat e Zyrës së Prokurorit të Specializuar. 

“Kam biseduar edhe me avokatin kah një orë e diçka, por unë jam i pafajshëm. Deklarohem i pafajshëm”, ka thënë ai.

Avokatët e Thaçit, Smakajt dhe Fazliut paraqitën argumente të ndryshme për lirimin e të pandehurve.

Edhe Arbëri 5 pri 2026 Mbrojtja kërkon lirimin e Thaçit, si argument paraqet vendosmërinë e tij për themelimin e Speciales

Ndër ta, avokati i Fazliut, Michael Pestman, i kërkoi sqarim Prokurorisë gjatë seancës se si është e mundur që i akuzuari Hajredin Kuçi është i lirë, përderisa pesha e akuzave është e ngjashme. Por Prokuroria nuk komentoi gjatë seancës.

Ndërsa argumentoi se Shqipëria është një nga vendet ku të pandehurit mund të ikin dhe të jenë të pakapshëm për Specialen.

E gjyqtarja Majorie Masselot konstatoi se të akuzuarit mund të arratisen dhe me lënien e tyre në liri ekziston rreziku i ndikimit te dëshmitarët. 

Në aktakuzë thuhet se vitin e kaluar i akuzuari Fahri Fazliu, bashkë me të birin që nuk është i akuzuar në këtë rast, vepruan sipas udhëzimeve të Thaçit për ta kontaktuar një dëshmitar.

“Hashim Thaçi dhe Fadil Fazliu e diskutuan edhe mënyrën se si duhet të jepen udhëzimet që i dha Thaçi, duke u pajtuar që i biri i Fadil Fazliut, Fahri Fazliu, do ta kontaktojë Dëshmitarin 1, për ta caktuar një takim. Fadil Fazliu dhe Fahri Fazliu u takuan paraprakisht me Dëshmitarin 1 më 29 qershor 2023 pas shkëmbimit të mesazheve më 26 qershor 2023. Më 3 korrik 2023, Fahri Fazliu shkëmbeu mesazhe me Dëshmitarin 1 më vonë gjatë ditës, në përputhje me udhëzimet që Hashim Thaçi ia dha Fadil Fazliut”, thuhet në aktakuzë.

E lidhur me Smakajn, ZPS-ja pretendon se i ka treguar si të dëshmojë një dëshmitari tjetër.

“Më 9 shtator 2023, Bashkim Smakaj, Blerim Shala, Artan Behrami dhe persona të tjerë e vizituan Hashim Thaçin në qendrën e paraburgimit. Gjatë vizitës, Hashim Thaçi dha informacion konfidencial lidhur me një dëshmitar të ZPS-së të rastit “Thaçi dhe të tjerët” dhe iu tha në mënyrë të përsëritur një apo më shumë prej vizitorëve të tij që t’i japin udhëzime Dëshmitarit 2 se si të dëshmojë në rastin e tij. Hashim Thaçi e cilësoi dëshminë e Dëshmitarit 2 si vendimtare dhe dha udhëzime për atë se çka duhet të thotë Dëshmitari 2 gjatë dëshmisë”, thuhet tutje në aktakuzë.

Të akuzuarit e tjerë të këtij rasti Hajredin Kuçi dhe Isni Kilaj, pritet të paraqiten në seancë të parë të hënën.

Në aktakuzë përmenden tri grupe njerëzish, që u udhëhoqën nga Thaçi: grupi i Kilajt, ai i Fazliut dhe i Smakajt, të cilët sipas Prokurorisë, ishin aktivë nga 12 prilli deri më 2 nëntor 2023 në ndikim të dëshmitarëve.

Përpjekja, sipas ZPS-së, ishte ndikimi te gjashtë dëshmitarë në rastin më të madh të Speciales.

Edhe LAJMET E MBRËMJES 27 shk 2026 ZPS-ja publikon audio përmes të cilave pretendon se Thaçi dha udhëzime si të sillen dëshmitarët në Hagë

Në rastin më të madh të Speciales, pos Thaçit, të akuzuar janë edhe Kadri Veseli, Jakup Krasniqi e Rexhep Selimi. Ata akuzohen për “krime lufte” dhe “krime kundër njerëzimit”.

Që të katërtit janë deklaruar të pafajshëm.