-
Nga:
Aurora Shala
- 23 gusht 2022 22:03
- Shpërndaje në:
Dy ministri, ajo e Arsimit dhe e Shëndetësisë, e kishin nënshkruar kontratën kolektive me punonjësit e tyre, pa mbulueshmëri financiare.
Megjithëse kontratat ishin nënshkruar nga niveli qendror, obligimi financiar u është bartur komunave, të cilat nuk kanë arritur ta mbulojnë.
Kontrata nuk është zbatuar në tërësi asnjëherë, ndërsa në disa raste, komunave paratë u janë marrë nëpërmjet përmbaruesve.
Të pakënaqura me këtë praktikë, nëpërmjet Asociacionit të Komunave të Kosovës, kanë dorëzuar në Gjykatën Themelore padi ndaj këtyre dy ministrive.
Sipas vlerësimit të AKK-së, vlera e dëmit e tejkalon shumën e 35 milionë eurove.
“Dëmi vlerësohet përgjatë këtyre viteve, nuk është vetëm për vitin e fundit, është rreth 35 milionë euro dhe shumica e mjeteve financiare të cilat janë marrë për zbatimin e kontratave kolektive, padrejtësisht janë marrë nga niveli lokal sepse niveli lokal nuk ka qenë nënshkrues i kontratave kolektive. Kanë qenë të dedikuara për investime kapitale d.m.th. për zbatimin e shumave të projekteve, të cilat do të shkojnë në dobi të qytetarëve”, tha Sazan Ibrahimi, drejtor ekzekutiv i AKK-së.
Ibrahimi gjithashtu ka theksuar se mënyra se si janë vendosur kontratat kolektive është e padrejtë, sepse nënshkrues është niveli qendror e dëmi material po bëhet mbi kurrizin e komunave.
