Kalifornia u bë shteti i 22-të ku nëpër shkolla mësohet shkrimi i dorës që shënon rritje të madhe në raport me vitin 2016, kur ai mësohej në vetëm 12 prej 50 shteteve të SHBA-së. Hulumtime të realizuara në dekadën e fundit në detaje kanë analizuar përparësitë e shkrimit me laps në letër
Numri i shteteve të Shteteve të Bashkuara të Amerikës që kërkojnë rikthimin e mësimit të shkrimit të dorës është përherë e në rritje, përderisa hulumtimet konfirmojnë përparësitë e shkrimit në letër, ka njoftuar rrjeti amerikan televiziv NBC.
Konkursi federal i shkrimit të dorës “Zanner-Blose” ka mbajtur edicionin e 33-të duke kurorëzuar kampionët e mëdhenj të vitit 2024: nëntë nxënës nga gjashtë shtete për shkrim të përsosur.
Kjo garë promovon shkrimin e dorës që në njëfarë forme po përjeton ringjallje në Shtetet e Bashkuara të Amerikës. Në janar Kalifornia u bë shteti i 22-të ku nëpër shkolla mësohet shkrimi i dorës, që shënon rritje të madhe në raport me vitin 2016, kur ai mësohej në vetëm 12 prej 50 shteteve të SHBA-së.
Hulumtime të realizuara në dekadën e fundit në detaje kanë analizuar se si shkrimi me laps në letër i shërben mbamendjes, zhvillimit të aftësive analitike dhe të mësuarit, të kuptuarit, leximit dhe aftësive të buta motorike.
Sharon Quirk-Silva, anëtare e Parlamentit Shtetëror të Kalifornisë që prezantoi projektligjin, ka thënë se përkundër faktit se bëhet fjalë për një shtet të polarizuar “ku kontestohen kaq shumë çështje, projektligji i shkrimit të dorës kishte mbështetje dhe vullnet të mirë dypartiak dhe njerëzit bien dakord për rëndësinë e shkrimit të dorës”.
“Për vite me radhë teknologjia kryeson plan-programin në shkolla dhe fëmijët thjesht qëndrojnë të qetë para ekranit. Tani po përhapet ndjesia se duhet t’u kthehet lapsi në dorë”, ka thënë Quirk-Silva.
Ligji i Kalifornisë përcakton që nxënësit nga klasa e parë deri në të gjashtën të kenë mësime me shkrim dore, gjë që, sipas Quirk-Silvas, përbën mjet të rëndësishëm gjuhësor dhe artistik.
“Është mënyrë për t’u ndalur një grimë derisa mendimet shkojnë nga truri te gishtat”, ka thënë ajo.
Hulumtimi i udhëhequr nga Sophia Vinci-Booher, asistente në Universitetin Vanderbilt në Nashville të Shteteve të Bashkuara të Amerikës, ka thënë se shkrimi i dorës i lejon fëmijët parashkollorë të krijojnë lidhje në tru, që ka të ngjarë të ndihmojë në njohjen e shkronjave.
Po ky hulumtim ka dëshmuar rëndësinë e aktit fizik të vizatimit – shkrimit të shenjave, gjegjësisht të shkronjave, ka thënë Vinci-Booher. Ajo ka numëruar përparësitë. “Shkrimi i dorës është i mirë për fëmijët sepse nxit zhvillimin e leximit dhe angazhon aftësi të shkëlqyera motorike, gjë që është e rëndësishme për zhvillimin e tyre”.
