“Prishtina në histori” me dy vëllime prej vitit 1315 deri më 1912

“Synimi ynë është ta bëjmë sa më të njohur dhe më të prekshme historinë e hershme të Prishtinës. Duke sjellë drejtpërdrejt dokumentet arkivore e duke përdorur grafika e ilustrime, Prishtina në histori si projekt nuk mëton vetëm publikun e specializuar të studiuesve, por secilin qytetar që mund të ketë interesim, ose që mund të zhvillojë interesim në historinë e qytetit”, ka thënë Yll Rugova, redaktori i botimeve dhe i qerthullit “Prishtina në histori”

Fiks 101 dokumente dhe fragmente që përmendin Prishtinën prej vitit 1315 deri më 1912, janë pjesë e vëllimit të parë të librave të shtypur “Prishtina në histori” të publikuara në javën e parë të shkurtit.

Siç ka bërë të ditur kolektivi “Trembelat”, si iniciues të qerthullit “Prishtina në histori” të lansuar rreth gjashtë muaj më parë, vëllimi i dytë përfshin tekste autoriale nga studiues të ndryshëm, që trajtojnë tema si origjina e qytetit, periudha osmane, dinastët e familjes Gjinolli dhe çështje të tjera për historinë e Prishtinës.

“Prishtina në histori” është projekti i cili është prezantuar si faqe digjitale e qasshme nga të gjithë me qëllim për të grumbulluar të dhëna, dokumente, harta, gravura, fotografi, punime e shkrime që e ndërtojnë historinë e qytetit të Prishtinës, duke qartësuar disa nga mjegullnajat rreth saj. Kjo platformë interaktive e lansuar si uebfaqe majin e kaluar, ngërthen informacione të ndryshme mbi kryeqytetin që shtrihen prej fundit të shekullit XIII deri në vitet e para të shekullit XX. Vetë platforma si e tillë identifikohet sikur “një qerthull digjital të dhënash në rrjet për masivizimin e trashëgimisë kulturore të kryeqytetit”. Si iniciativë vjen nga kolektivi “Trembelat” në mbështetjen e Komunës së Prishtinës në partneritet me Arkivin e Prishtinës.

E pas kësaj, sipas iniciuesve, librat e shtypur kanë edhe materiale shtesë.

Në mesin e tyre është një artikull krejt i ri për familjen Gjinolli, i përditësuar sipas dokumenteve arkivore, pastaj një fragment nga hrisobula e Graçanicës nga viti 1321, dokumente të pabotuara nga fushata habsburgase në Kosovë e vitit 1689, e të tjera. Librat, përveç tekstit, kanë edhe shumë ilustrime e grafika, një pjesë e tyre të dizajnuara enkas për botimin e shtypur.

“Synimi ynë është ta bëjmë sa më të njohur dhe të më prekshme historinë e hershme të Prishtinës. Duke sjellë drejtpërdrejt dokumentet arkivore, e duke përdorur grafika e ilustrime, Prishtina në histori si projekt nuk mëton vetëm publikun e specializuar të studiuesve, por secilin qytetar që mund të ketë interesim, ose që mund të zhvillojë interesim në historinë e qytetit”, ka thënë Yll Rugova, redaktori i botimeve dhe i qerthullit Prishtina në histori.

Edhe Kulturë 22 qer 2024 Prishtina pa rrëfim të plotë prej stacionit të shekullit XIII në metropol

“Këto janë dy vëllimet e para, por së shpejti pritet edhe një vëllim i tretë që përfshin dhjetë letra nga Anton Vas, nënkonsulli francez i Prishtinës në vitin 1812. Përvoja e tij e shkurtër në Prishtinë është shumë interesante, dhe besoj do të jetë me interes edhe për lexuesit”, ka thënë ai.

Autorë dhe bashkëpunëtorë të përfshirë në botim janë studiuesit: Agron Islami, Durim Abdullahu, Lekë Shala, Kaltrina Igrishta dhe Rinë Zhitia. Vëllimet janë të disponueshme në disa librari.